Намояндагони корпуси дипломатӣ ва созмонҳои байналмилалӣ ба тамошои мамнӯъгоҳи «Бешаи палангон» мераванд

ДУШАНБЕ, 29.05.2021/АМИТ «Ховар»/. 29 май роҳбарони корпусҳои дипломатӣ ва ташкилотҳои байналмилалии муқими Тоҷикистон ба тамошои  мамнуъгоҳи  «Бешаи палангон» мераванд. Онҳо бо  ин гӯшаи зебои Тоҷикистон,  бо захираҳои табиӣ ва олами набототу ҳайвоноти беназир ва  нодиртарин мавзеъҳои табиии давлатӣ — мамнӯъгоҳи «Бешаи палангон», ки соли 1938 таъсис ёфтааст, шинос мешаванд. Дар ин хусус ба АМИТ «Ховар» аз Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ доданд. 

Шиносоии намояндагони давлатҳои хориҷӣ ва созмонҳои байналмилалӣ бо табиати нотакрори Тоҷикистон  барои  шуҳрати бештар пайдо кардани боигариҳои табиии Тоҷикистон, аз ҷумла шомил шудани мамнӯъгоҳи мазкур ба феҳристи Мероси ҷаҳонии ЮНЕСКО  ва рушди туризми экологӣ дар Тоҷикистон мусоидат хоҳад кард.

Тибқи иттилои манбаъ, аз ҷониби Кумита ҷиҳати оммавигардонӣ ва таблиғи сайёҳии экологӣ дар Тоҷикистон бо 3 забон маълумот омода карда шудааст, ки он ба меҳмонон ҳамчун роҳнамо хизмат хоҳад кард. Ҳамзамон иштирокчиёни ин сафар аз хизмати роҳбаладҳо ва тарҷумонҳои забонҳои русӣ ва англисӣ баҳравар хоҳанд гашт.

 Акс аз манбаъҳои боз