ТАВАҶҶУҲ! Вазорати корҳои хориҷии Тоҷикистон аз шаҳрвандон ва шахсони ҳуқуқӣ хоҳиш менамояд аз сафар ба Қирғизистон худдорӣ намоянд

ДУШАНБЕ, 27.05.2021 /АМИТ «Ховар»/. Дар робита ба қарори Девони вазирони Ҷумҳурии Қирғизистон, №12-р аз 21 майи соли 2021, ки бидуни огоҳии пешакӣ қабул шудааст, Вазорати корҳои хориҷии Ҷумҳурии Тоҷикистон аз шаҳрвандони Ҷумҳурии Тоҷикистон хоҳишманд аст, ки аз ҳама гуна сафар ба Ҷумҳурии Қирғизистон ва ё убури транзитӣ ба кишварҳои дигар тариқи қаламрави Ҷумҳурии Қирғизистон худдорӣ намоянд.

Тавре АМИТ «Ховар» бо истинод ба ин вазорат хабар медиҳад, Вазорати корҳои хориҷии Ҷумҳурии Тоҷикистон аз шахсони ҳуқуқӣ ва соҳибкорони инфиродии Ҷумҳурии Тоҷикистон, ки ба ҳамлу нақли мусофирон ва бор тавассути ҳамаи навъҳои нақлиёт машғуланд, изҳори хоҳиш менамояд, ки аз қаламрави Ҷумҳурии Қирғизистон истифода накунанд ва масирҳои дигарро тавассути кишварҳои сеюм ба кор баранд.

Дар сурати поймол шудани ҳуқуқ ё зоҳир гардидани муносибати ғаразнок нисбат ба шаҳрвандони мо дар қаламрави Ҷумҳурии Қирғизистон, шаҳрвандони мо метавонанд ба Сафорати Ҷумҳурии Тоҷикистон дар Бишкек аз рӯи хатти алоқаи доимии рақамҳои +996500442211 ва +996312511637 муроҷиат кунанд.