«Вазъи кунунии театрҳои Тоҷикистон». Дар Вазорати фарҳанг таҳти ин унвон мизи мудаввар доир гардид
ДУШАНБЕ, 25.05.2021 /АМИТ «Ховар»/. Қисмати зиёди асарҳои ба озмун пешниҳодшуда ҷашнворагӣ набуда, бадеият ва касбият дар онҳо дида намешуд. Вақте бадеияту касбият дида намешавад, чӣ тавр метавон асарро намоишнома номид? Яке аз мушкилии дигари мо дар ин соҳа — ин нарасидани коргардонҳои касбӣ дар театрҳо мебошад. Пешниҳод менамоям, ки баҳри тарбияи каргардонҳои соҳавӣ курсҳои омӯзишии коргардонӣ ташкил карда шаванд.
Ин матлабро Раиси ҳакамони Фестивал-озмуни «Парасту-2021» Маҳмадулло Табаров зимни баргузории мизи мудаввар таҳти унвони «Вазъи кунунии театрҳои Тоҷикистон», ки 24 майи соли равон дар Вазорати фарҳанги Ҷумҳурии Тоҷикистон баргузор гардид, баён намуд.
Тавре аз Вазорати фарҳанг ба АМИТ «Ховар» хабар доданд, дар ҷамъомади мазкур, ки таҳти раёсати муовини аввали Вазири фарҳанг Обид Назариён баргузор гардид, санъатшиносон, коршиносон, мунаққидон, театршиносон, коргардонҳо ва ҳунармандони варзидаи театр иштирок намуда, оид ба асарҳои ба Фестивал-озмуни «Парасту-2021» пешниҳодшуда ибрози назар намуданд.
Аз ҷумла, мунаққид Ҷумъа Қуддус зикр кард, ки «Дар намоишномаҳои фестивали имсолаи «Парасту» драматургия дида намешуд. Пеш аз он, ки саҳна месозед, сараввал драмма созед. Пешниҳод менамоям, ки барои баланд бардоштани сатҳи касбии драматургон курсҳои омӯзишии драматургия ташкил карда шавад».
Коргардони шинохтаи тоҷик Давлат Убайдуллоев аз ҳунармандони ҷавон даъват ба амал овард, то бештар мутолиа намоянд, таърихро омӯзанд, забонҳои тоҷикӣ ва хориҷиро аз худ намоянд. Номбурда низ пешниҳод намуд, ки барои пешрафти кори коргардонӣ як озмоишгоҳи коргардонӣ ташкил карда шавад, то коргардонҳои ҷавони имрӯза тавонанд аз ин курсҳои омӯзишӣ баҳри пешрафти санъати театрӣ истифода баранд.
Профессор Тамара Абдушукурова зимни суханронии хеш аз ташаббускорон, ҳунармандон барои баргузории Фестивал-озмуни “Парасту-2021” изҳори сипас намуда, пешниҳод намуд, ки дар назди вазорат хазинаи маданият ташкил карда шавад, то барои беҳтар гардидани савияи дониши коргардонҳо, драматургҳо, ҳунармандони касбӣ курсҳои омӯзишӣ доир гарданд.
Ёдовар мешавем, ки даври ниҳоии Фестивал – озмуни ҷумҳуриявии театрҳои касбӣ «Парасту-2021» ба ифтихори 30-солагии Истиқлоли давлатии Ҷумҳурии Тоҷикистон охири моҳи майи соли равон баргузор мегардад.Даври минтақавии фестивал нимаи аввали моҳи апрел гузаронида шуд. Айни замон масъулини аксари театрҳои мамлакат номгӯи намоишҳои нави худро дар шабакаҳои иҷтимоӣ пешниҳод намуда, аз ҳаводорону шавқмандон даъват ба амал овардаанд, ки толорҳои театрҳои ҷумҳуриро холӣ намонда, ҳунармандонро мухлисӣ кунанд.
Хотиррасон менамоем, ки Фестивал-озмуни ҷумҳуриявии театрҳои касбӣ «Парасту» аз ҷониби Вазорати фарҳанги Ҷумҳурии Тоҷикистон бо мақсади рушди драматургияи миллӣ, санъати театрии мамлакат, таҳияи асарҳои баландғояи ватанӣ, баланд бардоштани сатҳи маҳорати касбии коргардонҳо, ҳунармандон, рассомон, бастакорон, ҳисси ифтихори ватандӯстию ватанпарастӣ ва анъанаҳои хуби таърихию фарҳангӣ гузаронида мешавад.











Дар кинотеатри «Ватан» нахустнамоиши филми муштараки «Дурахши ахтарон: Ҷомӣ ва Навоӣ» баргузор мешавад
ТАВСИЯИ МУТАХАССИС. Дар мавриди фоидаи ғизо ва нӯшокиҳо барои саломатӣ дар фасли зимистон
Китоби «Сотим Улуғзода дар шинохти Пешвои миллат» ба нашр расид
Бахшида ба фаъолияти Президенти Тоҷикистон китоби нав рӯнамоӣ гардид
Шералӣ Хоҷазода: «Маърифати ҳуқуқӣ омили муҳими ҳифзи мероси таърихию фарҳангӣ мебошад»
Доир ба саҳми Эмомалӣ Раҳмон дар татбиқи стратегияи рушди Ҷумҳурии Тоҷикистон китоби нав рӯнамоӣ гардид
Таҳти унвони «Президент — шаҳсутуни истиқлол ва давлатдории миллӣ» конференсияи ҷумҳуриявӣ доир шуд
Ҷилди сеюми китоби «Абармарди таърихсоз»-и академик Фарҳод Раҳимӣ ба нашр расид
Ҳамкории Тоҷикистон ва Қазоқистон дар соҳаи ҳифзи мероси фарҳангӣ ва хаттӣ густариш меёбад
Дар ёдгории таърихии Қалъаи «Золи Зар»-и ноҳияи Данғара корҳои сохтмонӣ оғоз гардиданд
Намоиши «Достони Сиёвуш» дар Москва ба саҳна гузошта шуд






