ВКХ Россия умедвор аст, ки ёддоштҳои тафоҳумро дар бораи амнияти биологӣ бо тамоми аъзои СПАД ва ИДМ имзо хоҳанд кард. Чунин санад аллакай бо Тоҷикистон имзо шудааст

ДУШАНБЕ, 14.05.2021 /АМИТ «Ховар»/.  Москва умедвор аст, ки ёддоштҳои тафоҳумро дар соҳаи амнияти биологӣ бо ҳама кишварҳо — аъзои СААД ва ИДМ имзо хоҳад кард. Тавре АМИТ «Ховар» бо истинод ба ТАСС хабар медиҳад, дар ин бора дирӯз, 13 май дар брифинг намояндаи расмии Вазорати корҳои хориҷии Россия Мария Захарова хабар додааст.

«Яке аз унсурҳои калидӣ — танҳо ягона не, вале яке аз унсурҳои марказӣ — ташаккули заминаи дахлдори ҳуқуқӣ бо давлатҳои аъзои СААД ва ИДМ мебошад. Бо ин мақсад мо роҳи бастани ёддоштҳои тафоҳуми дуҷонибаи байниҳукуматиро бо кишварҳои ин иттиҳодияҳо оид ба масоили амнияти биологӣ идома хоҳем дод, — ишора кард дипломат. «Мо умедворем, ки  чунин аснод бо тамоми давлатҳои СААД ва ИДМ имзо хоҳанд шуд».

Захарова ёдовар шуд, ки қаблан чунин аснод бо Тоҷикистон, Туркманистон ва Арманистон имзо шуда буд. Ба гуфтаи вай, ин ёддоштҳои тафоҳум «дар таҳкими муносиботи дӯстона ва амнияти биологӣ» -и кишварҳои онҳоро имзокарда саҳми назаррас мегузоранд, ба рушди ҳамкории онҳо дар соҳаҳои тиббӣ — биологӣ, санитарӣ-эпидемиологӣ, байторӣ ва фитосанитарӣ мусоидат мекунанд.

«Барои беҳтар кардан, баланд бардоштани самаранокии татбиқи ҳадафҳо ва муқаррароти ёддоштҳои тафоҳум мо ба нақша гирифтаем, ки шаклҳои машваратии дуҷонибаро оид ба масъалаҳои амнияти биологӣ ташкил кунем», — илова кард дипломат.

                                                      АКС аз манбаъҳои боз