Дар ҳудуди «Қалъаи Хуҷанд» сохтмони чойхона ва маҳаллаву хонаҳои қадимӣ идома доранд

ДУШАНБЕ, 26.06.2021 /АМИТ «Ховар»/. Дар партави дастуру ҳидоятҳои​ Пешвои миллат муҳтарам Эмомалӣ Раҳмон бо мақсади ҳифзи мероси фарҳангӣ  ва дар доираи омодагиҳо ба истиқболи ҷашни 30-солагии Истиқлоли давлатӣ дар  маркази вилояти Суғд таҷдиду барқарорсозии «Қалъаи Хуҷанд» ҷараён дорад. Корҳои таҷдиду навсозӣ бо назардошти пешниҳодоти олимону таърихшиносон сурат гирифта, дар ҳудуди қалъа бо риояи санъати меъмории миллӣ чойхона ва маҳаллаву хонаҳои қадимӣ сохта шуда истодааст.

Тавре аз хадамоти матбуоти дастгоҳи Раиси вилояти Суғд ба АМИТ «Ховар»  хабар доданд,  зимни боздиди Раиси вилоят Раҷаббой Аҳмадзода аз «Қалъаи Хуҷанд» таъкид шуд, ки қаълаи мазкур  дар тӯли садсолаҳо ҳамчун рамзи мардонагиву диловарӣ ва хештаншиносиву ватандӯстии тоҷикон ном бароварда,  ҳифзу барқарорсозии ин ёдгории таърихӣ барои муаррифии таъриху фарҳанг ва маданияти миллати тоҷик амри зарурӣ мебошад.

Роҳбари вилоят бо рассомону ороишгарон, меъморону таърихнигорон, гаҷкорон ва дигар масъулин суҳбат карда, барои бо сифати баланд ба иҷро расонидани корҳо, ба роҳ мондани ҳафриёти археологӣ, истифодаи унсурҳои миллӣ дар вақти таҷдиду барқарорсозӣ маслиҳату тавсияҳо дод.

Ёдовар мешавем, ки Қалъаи таърихии Хуҷанд дар маркази шаҳр, дар соҳили рости дарёи Сир дар масоҳати 200х300 м. ҷой гирифтааст. Дар бинои қалъа Осорхонаи таърихии вилояти Суғд ҷойгир шудааст, ки яке аз қисматҳои Маҷмааи фарҳангию таърихии «Қалъаи Хуҷанд» мебошад. Қалъаи бостонӣ ба  асри VII тааллуқ дорад.

Аксҳ аз манбаъҳои боз