ДИҚҚАТ! Рӯзҳои наздик дар баъзе минтақаҳои Тоҷикистон шиддатёбии вазиши шамол ва тӯфони чангу ғубор дар назар аст

ДУШАНБЕ, 20.06.2021/АМИТ «Ховар»/.  20-21 июни соли равон  дар баъзе ноҳияҳои ҷумҳурӣ шиддатёбии вазиши шамол бо суръати то 20-25м/с дар назар буда, дар баъзе ноҳияҳо тӯфони чангу ғубор ба амал меояд. Дар ин бора дирӯз Кумитаи ҳолатҳои фавқулода ва мудофиаи гражданӣ бо истинод ба Агентии обуҳавошиносии мамлакат хабар дод.

Бино ба иттилои манбаъ, ҳавошиносон шиддатёбии шамолро дар шаҳрҳои Душанбе, Хуҷанд, Панҷакент, Хоруғ, Гулистон, Кӯлоб ва Ҳисор пешбинӣ мекунанд.

Дар робита ба ин КҲФ ва МГ аз сокинони ноҳияҳои Панҷ, Ховалинг, Рӯшон, Файзобод, Лахш ва Ёвон низ даъват ба амал овардааст, ки эҳтиёткор бошанд. Дар деҳоти Панҷи Поён, Айвоҷ, Эсанбой, Санглоқ, Бӯстонобод, ағбаҳои Чормағзак, Анзоб ва Шаҳристон низ вазиши шиддатноки шамол дар назар аст.

КҲФ ва МГ дар бораи эҳтимолияти тӯфони чангу ғубор ҳушдор дод.

Бино ба шарҳи Кумитаи мазкур, шамоли шиддатнок метавонад ба хатҳои барқ хисорот расонад, ки боиси қатъ шудани он ​​дар нуқтаҳои аҳолинишин, фурӯ рехтани иншооти номустаҳкам,  боми биноҳо ва афтодани дарахтон гардад.

КҲФ ва МГ аз сокинони минтақаҳо даъват ба амал овард, ки ашёи рӯзгорро аз ҳавлӣ ва балконҳо дур кунанд, дарахтони хушкро буранд, мошинҳоро аз иншооти ноустувор дуртар нигоҳ доранд ва агар имкон бошад, онҳоро дар гаражҳо гузоранд.

АКС: КҲФ ва МГ