Намояндагони корхонаҳои нассоҷӣ ва дӯзандагии Тоҷикистон ба Ӯзбекистон сафар карданд

Июнь 29, 2021 11:14

ДУШАНБЕ,29.06.2021/АМИТ «Ховар»/. Имрӯз Намояндагони корхонаҳои нассоҷӣ ва дӯзандагии Тоҷикистон бо сафари омӯзишӣ вориди Ҷумҳурии Ӯзбекистон шуданд. Боздид, ки барои барқарор кардани робитаҳои нави тиҷоратӣ дар минтақа, омӯзиши таҷрибаи ҳамсояҳо ва роҳандозии ҳамкорӣ  сурат мегирад, бо ибтикор ва пешбурди Маркази тиҷорати байналмилалӣ (МТБ) дар чаҳорчӯбаи Барномаи ҷаҳонии нассоҷӣ ва дӯзандагӣ (GTEX) созмон дода шудааст.

Ҳайати Тоҷикистон аз раҳбарон ва намояндагони 17 корхонаи нассоҷӣ ва дӯзандагӣ, ду ширкати консалтингӣ, ду донишгоҳ, ду иттиҳодияи тиҷоратӣ ва як вазорати соҳавӣ иборат аст.

Ҳадаф аз ин сафар шиносоии намояндагони соҳаи нассоҷӣ бо соҳаи нассоҷӣ дар вилоятҳои Фарғона, Намангон ва Андиҷон мебошад. Интизор меравад, ки намояндагони ширкатҳои нассоҷии тоҷик бо ҳамтоёни  ӯзбекашон робитаҳои нави тиҷоратӣ барқарор намуда, бозори ашёи хому фазои фурӯшгоҳҳои чаканаи маҳсулоти соҳаро меомӯзанд. Онҳо ҳамчунин, доир ба масъалаҳо ва сиёсатгузориҳои соҳавӣ дар Ӯзбекистон, ба мисли молиёт ва андоз, тартиби содироту воридот, дастрасӣ ба маблағгузорӣ, ва пуштибонии давлат аз соҳа маълумот мегиранд. Вохӯриҳо бо иттиҳодияҳо ва донишгоҳҳои соҳавӣ барои эҷоди ҳамкорӣ  дар оянда замина фароҳам хоҳад овард.

Ҳайати Тоҷикистон аз ширкатҳои маъруфи Ӯзбекистон боздид намуда, бо технология ва равандҳои истеҳсолии ин корхонаҳо шинос мешавад ва таҷрибаи онҳоро меомӯзад.

Дар ҷараёни вохӯриҳо, роҳандозии барномаҳои ҳамкорӣ миёни донишгоҳҳои соҳавии Тоҷикистону Ӯзбекистон низ баррасӣ мегардад.

Қарор аст, ки Донишкадаи политехникии Донишгоҳи Техникии Тоҷикистон ба номи академик М.С.Осимӣ ва Донишгоҳи технологии Тоҷикистон аз як ҷониб ва аз ҷониби дигар Донишкадаи муҳандисӣ ва технологии Намангон cозишномаҳои ҳусни тафоҳум имзо намоянд. Дар ҷараёни боздид аз ин муассисаи омӯзишӣ меҳмонон бо ҷараёни таълим ва омодасозии мутахассисони оянда шинос мешаванд.

Ҳамчунин ба роҳ мондани ҳамкорӣ  миёни иттиҳодияҳо ва ниҳодҳои хидматрасони тиҷоратии ду кишвар баррасӣ мешавад. Бахшҳои намангонии Иттиҳодияи Узтекстилпром ва Палатаи савдо ва саноати Ӯзбекистон дар бораи соҳаи нассоҷӣ, имкониятҳо ва иқтидорҳои мавҷуда дар минтақа маълумот дода, заминаҳои ҳамкорӣ бо ҳамтоёни тоҷикашонро баррасӣ хоҳанд кард.

Инчунин соҳибкорони ду кишвар дар дидорҳои дуҷонибаи тиҷоратӣ (B2B) масъалаҳои марбут бунёди ширкатҳои муштаракро баррасӣ хоҳанд кард.

Сафари намояндагони корхонаҳои нассоҷӣ ва дӯзандагии Тоҷикистон ба Ӯзбекистон, ки то 3 июл идома меёбад, аз ҷониби Иттиҳодияи «Узтекстилпром» ва ҳамкорони МТБ дар Тоҷикистон – ширкатҳои консалтингии «ACT Development Group» ва «Business Consulting Group» дар ҳамоҳангӣ бо Вазорати саноат ва технологияҳои нави Ҷумҳурии Тоҷикистон ва Палатаҳои савдо ва саноати Тоҷикистон ва Ӯзбекистон созмон дода шудааст.

Июнь 29, 2021 11:14

Хабарҳои дигари ин бахш

Пойгоҳҳои обкашӣ дар ноҳияи Зафаробод пурра навсозӣ гардида, 2378 гектар замин ба гардиши кишоварзӣ ворид мегардад
Пахтакорони ноҳияи Ҷаббор Расулов дар майдони зиёда аз 5 ҳазор гектар кишти чигит мегузаронанд
Вазири кишоварзии Тоҷикистон вобаста ба тақвияти корҳои саҳроӣ бо деҳқонони шаҳри Конибодом суҳбат намуд
Дар шаҳри Хоруғ корхонаи истеҳсоли ҳасиб бунёд мегардад
Дар Суғд барои дарёфти грантҳои раиси вилоят озмун баргузор мешавад
Дар Эстония Хонаи савдои Тоҷикистон таъсис дода мешавад
Намояндагони Тоҷикистон дар «Аirspace world 2024» дар Женева иштирок намуданд
Роҳбари хоҷагии деҳқонии «Бобои Носир»: «Истифодаи оқилонаи 7,5 гектар замин ва даромад аз он дар баланд гардидани сатҳи зиндагии 5 оила мусоидат намуд»
Деҳқонони ноҳияи Мастчоҳ имсол дар майдони зиёда аз 23 ҳазор гектар кишту парвариши зироати кишоварзиро ба нақша гирифтаанд
Дар шаҳри Хуҷанд Намоишгоҳи X байналмилалии савдо «Суғд-2024» доир мегардад
«РОҲ БА СӮИ ТИЁНШОН». Душанбе охири моҳи май мизбони конфронси байналмилалӣ мегардад
Соли 2023 ба буҷети шаҳри Гулистон аз ҳисоби хизматрасонии сайёҳӣ ва табобатӣ зиёда аз 40 миллион сомонӣ ворид шуд