ТАНҲО САДОСТ, КИ ҶОВИДОН МЕМОНАД. Дар Душанбе китоби «Ҳамсози дарё» рӯнамоӣ гардид

Июль 1, 2021 14:08

ДУШАНБЕ, 01.07.2021. /АМИТ «Ховар»/. Дар Пажӯҳишгоҳи илмӣ-тадқиқотии фарҳанг ва иттилоот китоби «Ҳамсози дарё», ки  дар он мақолаҳо ва хотираҳои дӯстону ҳамкорон сароянда, номзади илмҳои таърих Абӯбакр Зубайдӣ гирд оварда шудааст, рӯнамоӣ гардид.

Нависанда ва рӯзноманигори маъруфи тоҷик Шаҳобиддини Ҳақназар китоби «Ҳамсози дарё»-ро муаррифӣ намуда, зикр кард, ки дар ин китоб маҷмӯи мақолаву нигоштаҳои дӯстону ҳамкасбон ва шогирдони марҳум Абӯбакр Зубайдӣ гирд оварда шудаанд. Аксари маводҳои китоб хусусияти ёддоштӣ дошта, дар онҳо муаллифон доир ба паҳлуҳои фаъолияти овозхонӣ, омӯзгорӣ, илмӣ ва хислатҳои инсонии шодравон А. Зубайдӣ андешаҳои хешро ба қалам додаанд. Аз ин олими номвар чандин китоб ва даҳҳо мақолаҳои илмию маърифатӣ ба мерос мондаанд ва муҳим аз ҳама, садои ӯ ҷовидона дар замири мухлисонаш нақш хоҳад монд.

Дар ин маҳфил Шоири халқии Тоҷикистон Камол Насрулло, Ҳунарпешаи халқии Тоҷикистон Хосият Ортиқова (Хосияти Зарафшонӣ), муовини директори Пажӯҳишгоҳи илмӣ-тадқиқотии фарҳанг ва иттилоот Шариф Комилзода, олимону дӯстон — Шамсиддин Солеҳ, Шарифмурод Исрофилниё, Салими Зарафшонфар ва дигарон доир ба паҳлуҳои мухталифи ҳаёт ва фаъолияти А. Зубайдӣ ибрози андеша намуданд.

Инчунин, дар ин маҳфил филми мустанаде аз кору фаъолияти илмӣ ва ҳунарии Абӯбакр Зубайдӣ ба тамошо гузошта шуда, дар охир ба иштирокдорон китоби «Ҳамсози дарё» ва фиттаи сурудҳои марҳум Абӯбакр Зубайдӣ тақдим карда шуданд.

МАЪЛУМОТНОМАИ АМИТ «ХОВАР»:

Абӯбакр Зубайдӣ (Абӯбакр Зубайдов) 1 июли 1958 дар деҳаи Ворӯи ноҳияи Панҷакент таваллуд шудааст. Ӯ сароянда, мутриб-таронасаро, номзади илмҳои таърих (2005), барандаи ҷоизаи фестивал-конкурси телевизионии эҷодиёти халқ «Андалеб-96» ва Аълочии фарҳанги Ҷумҳурии Тоҷикистон (1997) мебошад.

Абӯбакр Зубайдӣ баъди хатми мактаби таҳсилоти ҳамагонӣ, соли 1975 таҳсилро дар шӯъбаи суруд ва мусиқии факултаи корҳои маданию фароғатии Донишкадаи давлатии санъати Тоҷикистон ба номи М. Турсунзода идома дода, онро соли 1979 бо дипломи имтиёзнок хатм намудааст. Дар Донишкадаи зикршуда ба сифати омӯзгор, мудири кафедраи созҳои мусиқӣ, мудири кафедраи «Тарбияи мусиқӣ», мудири кафедраи созҳои мусиқӣ, декани факултаи мусиқӣ-омӯзгорӣ фаъолият намуда, зимни ин дар тарғибу иҷрои осори мусиқии мардумӣ, махсусан мақомӣ корҳои ҳунарӣ анҷом додааст.

Номбурда дар мавзӯи: «Таърихи фаъолияти ҳунармандони Тоҷикистон дар солҳои 30-80-уми асри XX» рисолаи номзадӣ дифоъ намудааст. Абӯбакр Зубайдӣ шоха, гӯшаҳои мусиқии устодона «Кӯчабоғи ду», «Талқини Бухоро», «Қашқарчаи талқини Бухоро», «Уфари Талқини Бухоро» ва сурудҳои зиёдро бо сабки хос иҷро намуда, дар хазинаи тиллоии радио ва телевизиони ҷумҳурӣ сабт намудааст. Муаллифи зиёда аз 20 мақолаҳои таҳқиқӣ оид ба анъаноти эҷодию иҷроии мусиқии тоҷик аст.

Ӯ то даргузаш (15 майи соли 2020) муовиини директори Пажӯҳишгоҳи илмӣ-тадқиқотии фарҳанг ва иттилоот буд.

Июль 1, 2021 14:08

Хабарҳои дигари ин бахш

Дар мавзеи Сари Майни ноҳияи Айнӣ корҳои омӯзишии бостоншиносӣ ва антропологӣ оғоз ёфт
Санъаткорони Қирғизистон Осорхонаи миллии Тоҷикистонро тамошо карданд
Дар Душанбе бо мақсади рушди ҳамкорӣ дар самти илмҳои яхшиносӣ вохӯрӣ баргузор гардид
Ба Маркази мероси хаттӣ беш аз 100 нусха китобҳои чопи сангӣ ва дастнависҳо тақдим гардид
«ШОҲНОМА». Фирдавсӣ дар сар то сари ин асари безавол дӯст доштани Ватанро таъкид мекунад
Дар Бадахшон 70 нафар ба даври ниҳоии Озмуни ҷумҳуриявии «Тоҷикистон – Ватани азизи ман» роҳхат гирифтанд
Беш аз 23 ҳазор нусха китобҳои Китобхонаи миллии Тоҷикистон ба шаҳру ноҳияҳои ҷумҳурӣ фиристода шуд
«ДӮСТИИ АБАДӢ». Таҳту чунин унвон барномаи фарҳангии Тоҷикистон ва Қирғизистон доир мегардад
Собиқ Вазири фарҳанги Ҷумҳурии Тоҷикистон Тамара Абдушукурова аз олам даргузашт
Ҷаласаи вазирони фарҳанги давлатҳои аъзои Созмони ҳамкории Шанхай доир гардид
Имсол дар Академияи миллии илмҳои Тоҷикистон 8 озмоишгоҳи замонавӣ ба истифода дода шуд
ҲАРГИЗ НАМИРАД ОН КИ ДИЛАШ ЗИНДА ШУД БА ИШҚ. Девони Ҳофиз дар Тоҷикистон беш аз сад маротиба ба нашр расидааст