Ҷаласаи Шӯрои Ассамблеяи Парлумонии Созмони Аҳдномаи амнияти дастаҷамъӣ дар шаҳри Душанбе баргузор гардид

Июль 1, 2021 16:04

ДУШАНБЕ, 01.07.2021 /АМИТ«Ховар»/. Имрӯз дар шаҳри Душанбе таҳти раёсати Раиси Шӯрои Ассамблеяи Парлумонии Созмони Аҳдномаи амнияти дастаҷамъӣ, Раиси Думаи Давлатии Маҷлиси Федералии Федератсияи Россия Вячеслав Викторович Володин ҷаласаи навбатии Шӯрои Ассамблеяи Парлумонии Созмони Аҳдномаи амнияти дастаҷамъӣ (АП СААД) доир гардид, ки дар он Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ иштирок ва суханронӣ намуданд.

Дар ин бора аз  Маҷлиси миллии Маҷлиси Олии Ҷумҳурии Тоҷикистон ба АМИТ «Ховар» иттилоъ доданд.

Зимни суханронии худ Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ иштирокдорон ва меҳмонони ҷаласаро ба пойтахти мамлакат хайрамақдам гуфта, дар хусуси афзалиятҳои раёсати Ҷумҳурии Тоҷикистон дар Созмони Аҳдномаи амнияти дастаҷамъӣ, ки дар соли 2021 идома дорад, ибрози назар карданд.

Аз ҷумла, зикр гардид, ки фаъолияти СААД омили нигаҳдории сулҳу пойдорӣ дар минтақаи таҳти масъулияти он маҳсуб ёфта, Ҷумҳурии Тоҷикистон ба ҳамкории мутақобилаи кишварҳои аъзо дар доираи Созмон аҳамияти афзалиятнок медиҳад ва ҷонибдори кӯшишҳои муштарак ҷиҳати ба даст овардани ҳадафҳои оинномавии он мебошад.

Аз ин рӯ афзалиятҳои раванди раёсати Тоҷикистон тамоми ҷанбаҳои амалу ҳамкории  мутақобила дар бахши мудофиа ва амниятро, ки дар Нақшаи чорабиниҳои аз ҷониби Президенти Ҷумҳурии Тоҷикистон тасдиқгардида ва Консепсияи раёсати Тоҷикистон дар СААД инъикос ёфтааст, фаро мегирад. Дар ин робита тавсеаи амалҳои якҷоя дар масири Ассамблеяи Парлумонии СААД ҳамчун яке аз самтҳои асосии раёсати мо ба ҳисоб меравад.

Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ зимни суханронии худ диққати иштирокдорони ҷаласаро ҳамчунин ба масъалаҳои дигари ҳамкорӣ, аз ҷумла дар бахши сиёсӣ, баланд бардоштани самаранокии муборизаи муштарак бар муқобили таҳдиду хатарҳои анъанавию муосир ба амният, аз ҷумла терроризм, экстремизм, шаклҳои гуногуни радикализм, ҷинояткории муташаккили фаромиллӣ ва киберҷинояткорӣ ҷалб карданд.

Таъкид гардид, ки бо таваҷҷуҳ ба тезутунд гардидани вазъият дар арсаи байналмилалӣ, бахусус вазъи ҳарбиву сиёсӣ дар минтақаи амнияти дастаҷамъӣ, аз ҷумла дар Афғонистон ҷалби фаъолонаи воситаҳои сиёсиву дипломатӣ барои ҳалли қазияи афғонӣ, инчунин андешидани тадбирҳои саривақтӣ ҷиҳати мустаҳкам кардани иқтидори ҳифзи сарҳади байни Тоҷикистону Афғонистон тақозо мегардад.

Бо дарназардошти пандемияи бемории КОВИД-19, муҳимияти муттаҳид сохтани талошҳо баҳри татбиқи тадбирҳо оид ба таъмини бехатарӣ аз хавфи бемориҳои сироятӣ ва идомаи корҳо ҷиҳати таъмини амнияти тиббию биологӣ зикр гардид.

Мавриди  зикр аст, ки дар кори ҷаласаи мазкур роҳбарон ва ҳайатҳои парламентии давлатҳои аъзои Созмони Аҳдномаи амнияти дастаҷамъӣ — Федератсияи Россия, ҷумҳуриҳои Тоҷикистон, Беларус, Қирғизистон, давлатҳои мушоҳиди ин созмон-Ҷумҳурии Исломии Афғонистон ва Ҷумҳурии  Сербия, инчунин роҳбарияти Котиботи Созмони Аҳдномаи амнияти дастаҷамъӣ ширкат доштанд. Ҳайати парламентии ҷумҳуриҳои Арманистон ва Қазоқистон дар ҷаласаи Шӯрои Ассамблеяи Парлумонии Созмони Аҳдномаи амнияти дастаҷамъӣ ба таври маҷозӣ ширкат намуданд.

Тибқи рӯзнома ҷаласаи Шӯрои Ассамблеяи Парлумонии Созмони Аҳдномаи амнияти дастаҷамъӣ маҷмӯи масъалаҳои марбут ба фаъолияти созмонро мавриди баррасии ҳамаҷониба қарор дода, аз рӯи онҳо қарорҳои дахлдор қабул намуд.

Бо ҳамин кори ҷаласаи навбатии Шӯрои Ассамблеяи Парлумонии Созмони Аҳдномаи амнияти дастаҷамъӣ дар шаҳри Душанбе ба фарҷом расид.

Июль 1, 2021 16:04

Хабарҳои дигари ин бахш

Раиси кумитаи Маҷлиси миллӣ бо Сафири Франсия дар Тоҷикистон мулоқот намуд
Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ бо Раиси Сенати Парламенти Ҷумҳурии Қазоқистон Ашимбаев Маулен Сагатханули суҳбати телефонӣ анҷом доданд
Вокуниши Маҷлиси миллии Маҷлиси Олии Ҷумҳурии Тоҷикистон ба муроҷиати дастаҷамъонаи намояндагони ҷомеаи шаҳрвандӣ таҳти унвони «Мо ҷонибдори амнияти фарзандонамон»
Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ бо Раиси Думаи Давлатии Маҷлиси Федералии Федератсияи Россия Вячеслав Володин мулоқот намуданд
Имрӯз дар Душанбе ҷаласаи Шӯрои Ассамблеяи Парлумонии СААД баргузор мешавад
Маҷлиси намояндагон дар давраи иҷлосияи дуюм беш аз 817 санади меъёрии ҳуқуқиро мавриди баррасӣ қарор дода, қарорҳои дахлдор қабул намуд
Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ бо Раиси Вулуси ҷиргаи (Маҷлиси намояндагони) Шӯрои миллии Ҷумҳурии Исломии Афғонистон Мир Раҳмон Раҳмонӣ мулоқот намуданд
Барои бозгардонии дороиҳо, маблағҳо ва ҷалби сармояи шаҳрвандон ба иқтисоди миллӣ шароити мусоид фароҳам оварда мешавад
Лоиҳаи қонун «Дар бораи авф бинобар қонунигардонии дороиҳо ва маблағҳои шаҳрвандони Ҷумҳурии Тоҷикистон» мавриди баррасӣ қарор гирифт
Ҷаласаи ҳамоҳангсозии сарони ҳайатҳои парлумонии кишварҳои узви СААД дар АБ САҲА фосилавӣ баргузор гардид
Дар иҷлосияи дуюми Маҷлиси намояндагон, даъвати шашум як зумра қарорҳои дахлдор қабул карда шуданд
Раиси Гурӯҳи дӯстии Маҷлиси намояндагон бо Сафири фавқуллода ва мухтори Фаронса дар Ҷумҳурии Тоҷикистон мулоқот намуд

Маводҳои таҳлилӣ