Вазири мудофиаи миллии Туркия Хулусӣ Акар: «Мо Тоҷикистонро ҳамчун кишвари дӯсту бародар ва шарики муҳим дар минтақаи Осиёи Марказӣ меҳисобем»

Июль 1, 2021 14:17

ДУШАНБЕ, 01.07.2021 /АМИТ «Ховар»/. Тавре  қаблан  иттилоъ додем, имрӯз дар Қасри миллат Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Вазири мудофиаи миллии Ҷумҳурии Туркия Хулусӣ Акарро ба ҳузур пазируфтанд.

Ба иттилои  хабарнигори  АМИТ «Ховар», пас аз мулоқот бо Пешвои миллат муҳтарам Эмомалӣ Раҳмон  Вазири мудофиаи миллии Ҷумҳурии Туркия Хулусӣ Акар дар нишасти хабарӣ чунин гуфт: «Мо бо Президент муҳтарам Ҷаноби Олӣ Эмомалӣ Раҳмон мулоқоти пурмаҳсул ва муҳим доштем. Албатта Ҷаноби Президентро пеш аз сафар ба Ҷумҳурии Тоҷикистон бисёр хуб менишохтам. Лекин имрӯза мулоқоти рӯ ба рӯи мо самарии бисёр хуб дошт. Ман таассуроти зиёд гирифтам».

Ӯ ҳамчунин гуфт, ки имконияти муфиде дошт, аз фикру ақидаҳои шахсии Президенти Тоҷикистон доир ба масъалаҳои минтақа  огоҳ шавад.

Ба таъкиди Вазири мудофиаи миллии Туркия, Президенти Тоҷикистон дар бораи масъалаҳои имрӯз вуҷуддошта андешаҳову таҳлилҳои амиқи худро баён доштанд ва пешниҳодҳои худро вобаста ба ояндаи Тоҷикистон ва минтақаи Осиёи Марказӣ ироа намуданд.

«Ҷаноби Президент инчунин Презденти Ҷумҳурии Туркия Реҷеп Тайип Эрдуғонро ба Тоҷикистон бори дигар расман даъват намуданд. Ман ба Президенти Ҷумҳурии Тоҷикистон муҳтарам Эмомалӣ Раҳмон дар бораи нияти Президенти Ҷумҳурии Туркия вобаста ба анҷом додани сафар дар ояндаи наздик ба Тоҷикистон хабар додам», — тазаккур дод ӯ.

Хулусӣ Акар ҳамчунин изҳори боварӣ намуд, ки сафар ва мулоқотҳои дуҷонибаи роҳбарони сатҳи олии ҳарду кишвар барои боз ҳам ба сатҳи баланд баровардани ҳамкорӣ байни вазоратҳои мудофиа такони тоза мебахшанд.

«Инчунин мо имрӯз оид ба масъалаҳои муайяни ҳамкорӣ мубодилаи афкор доштем. Гуфта метавонам, ки кишварҳои мо вобаста ба масъалаҳои байналмилалӣ мавқеи ҳамсон доранд. Мо Ҷумҳурии Тоҷикистонро ҳамчун кишвари дӯсту бародар ва шарики муҳим дар минтақаи Осиёи Марказӣ меҳисобем. Ҳарду кишвар арзишҳои умумӣ доранд, ки яке аз онҳо асари безаволи Мавлоно Ҷалолиддин Румӣ мебошад, ки мардумони мо имрӯз аз он баҳра бурда истодаанд», — гуфт Вазири мудофиаи миллии Туркия.

Ба гуфтаи ӯ, зимни мулоқот инчунин оид ба масъалаҳои ҳамкории дуҷониба ва минтақавӣ, аз ҷумла вазъи Афғонистон мубодила афкор сурат гирифтааст.

«Пас аз мулоқоти имрӯза бо Президенти Ҷумҳурии Тоҷикистон муҳтарам Эмомалӣ Раҳмон, ки ба мо дастуру ҳидоятҳои хешро доданд, вазоратҳои мудофиаи ҳарду кишварро мебояд ҳамкориро дар самтҳои гуногун, аз ҷумла дар самти мудофиа боз ҳам ба сатҳи баланд бардоранд ва сафарҳои дуҷонибаро дар оянда тақвият диҳанд, то ба беҳтар намудани ҳамкории хосаи байни кишварҳо, хосатан вазоратҳои мо такони тоза бахшанд», — ибрози андеша намуд Хулусӣ Акар.

Дар охир ӯ бо истифода аз фурсат таманниёти беҳтарини худ ва мардуми Туркияро ба мардуми Тоҷикистон расонид.

 

АКС: Хадамоти матбуоти Президенти ҶТ/АМИТ «Ховар»

Июль 1, 2021 14:17

Хабарҳои дигари ин бахш

Шараф Шерализода бо муовини котиби давлатии Котиботи давлатии Швейтсария оид ба молияи байналмилалӣ мулоқот намуд
Намояндаи Тоҷикистон дар чорабинӣ оид ба маблағгузории миллӣ барои расидан ба Ҳадафҳои Рушди Устувор иштирок намуд
Ҷонибек Ҳикмат дар чорабинӣ бахшида ба Рӯзи байналмилалии «ҷаҳони бе партов» иштирок намуд
Дар қароргоҳи Созмони Милали Муттаҳид бахшида ба таҷлили ҷашни Наврӯзи байналмилалӣ ҳамоиши тантанавӣ доир гашт
Деннис Фрэнсис саҳми Тоҷикистонро дар пешбарии масъалаҳои марбут ба об баланд арзёбӣ намуд
Дар Ню-Йорк аҳаммияти фаъолияти Раванди оби Душанбе баррасӣ гардид
Дар шаҳри Остона ҷашни байналмилалии Наврӯз таҷлил гардид
Вазири корҳои хориҷии Тоҷикистон дар Конфронс ба муносибати Рӯзи ҷаҳонии об иштирок намуд
Тоҷикистон ва Туркия муносибатҳои дуҷонибаро дар самтҳои сиёсӣ, иқтисодӣ ва сармоягузорӣ баррасӣ намуданд
Дар шаҳри Москва Наврӯзи байналмилалиро таҷлил намуданд
Ҷашни байналмилалии Наврӯзро дар Ашқобод бошукуҳ таҷлил намуданд
Дар Берлин ҷашни байналмилалии Наврӯзро таҷлил намуданд