Тоҷикистон ва Қатар дарёфти роҳҳои нави ҳамкории тиҷоратию иқтисодӣ ва сармоягузориро баррасӣ намуданд

ДУШАНБЕ, 02.07.2021/АМИТ «Ховар»/. Дарёфти роҳҳои нави ҳамкории тиҷоратию иқтисодӣ ва сармоягузорӣ дар вохӯрии маҷозие,  ки бо иштироки роҳбарияти Кумитаи давлатии сармоягузорӣ ва идораи амволи давлатӣ бо Ассотсиатсияи мустақили ҷаҳонии Қатар (QIGA)  доир гардид, баррасӣ шуд. Дар вохӯрӣ Сафири Фавқулодда ва Мухтори Ҷумҳурии Тоҷикистон дар Қатар, намояндагони вазорату идораҳои дахлдор, роҳбарияти Ассотсиатсияи «TUYAD», ширкати «Hedefkoc», инчунин беш аз 10 аъзоёни Ассотсиатсияи QIGA  иштирок намуданд.

Дар вохӯрӣ ба соҳибкорону сармоягузорони Қатар имкониятҳои сармоягузории Ҷумҳурии Тоҷикистон рӯнамоӣ  гардида, аз доираҳои соҳибкорону сармоягузорони қатарӣ барои иштирок дар лоиҳаҳои сармоягузории афзалиятноки ҷумҳурӣ даъват ба амал оварда шуд.

Кумитаи давлатии сармоягузорӣ ва идораи амволи давлатӣ иттилоъ медиҳад, ки дар вохӯрӣ миёни ҷонибҳо мубоҳисаи судманд  барои дарёфти роҳҳои нави ҳамкории тиҷоратию иқтисодӣ ва сармоягузорӣ сурат гирифт.

  Акс аз Кумитаи давлатии сармоягузорӣ ва идораи амволи давлатӣ