Дар Осорхонаи миллии Тоҷикистон намунаҳои гуногуни китобҳои нодири дастнавис ва чопи сангӣ намоиш дода мешаванд
ДУШАНБЕ, 23.08.2021 /АМИТ «Ховар»/. Имрӯз дар Осорхонаи миллии Тоҷикистон бахшида ба ҷашни 30-солагии Истиқлоли давлатии Ҷумҳурии Тоҷикистон ва бо мақсади муаррифию арҷгузорӣ ба мероси хаттии тоҷикон таҳти унвони «Мероси хаттӣ – бозгӯи осори ниёгон» намоиш ифтитоҳ гардид, ки то 20 сентябр идома меёбад, иттилоъ дод ба АМИТ «Ховар» сардори шуъбаи экскурсионӣ ва оммавии Осорхонаи миллии Тоҷикистон Фаридун Кенҷаев.
Дар ифтитоҳи намоиш роҳбарият ва кормандони Осорхонаи миллии Тоҷикистон, намояндагони Маркази мероси хаттии Академияи миллии илмҳои Тоҷикистон, Донишгоҳи давлатии омӯзгории Тоҷикистон ба номи Садриддин Айнӣ, Осорхонаи Гимеи шаҳри Парижи Фаронса ва дигарон иштирок ва суханронӣ намуданд.
Директори Осорхонаи миллии Тоҷкистон Аҳлиддин Ибодуллозода зикр дошт, ки мероси хаттии ҳар миллат ҳамчун сарчашмаи муҳими таърихӣ дар омӯзиши ҷанбаҳои мухталифи таърихи гузаштаи он нақши басо муҳим ва калидӣ дорад. Бо шарофати Истиқлоли давлатӣ ва сиёсати фарҳангпарваронаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имрӯзҳо дар кишвари азизамон ҷамъоварии мероси хаттӣ ва оммавигардонии онҳо ба ҳукми анъана даромада, осори хаттии ниёгон дар ихтиёри оммаи васеи хонандагон қарор гирифтааст.
Дар намоиши мазкур аз фонди Осорхонаи миллии Тоҷикистон зиёда аз 120 адад намунаҳои гуногуни китобҳои нодири дастнавис ва чопи сангӣ, ки фарогири мавзӯъҳои таърих, ирфон, ахлоқ, забону адабиёт, сарфу наҳви арабӣ ва фиқҳи ҳанафӣ мебошанд, ба маърази тамошо гузошта шудаанд.
Ҳамчунин 20 адад сиккаҳои таърихӣ (санадҳо оид ба хариду фурӯши замин), 11 адад лавҳаҳои гуногуни ҳунари хушнависӣ, 4 адад сӯзаниҳои катибадор ва дигар мероси таърихию фарҳангӣ, ки инъикосгари таъриху фарҳанг, китобдориву китобсозӣ ва ҳунарҳои хаттотӣ, хушнависӣ ва саҳифабандиву муқовасозии ниёгони мо мебошанд, пешниҳод гардидаанд.
Мероси хаттии тоҷикон дар баробари муаррифи бузурги таъриху фарҳанги миллати тоҷик будан, инчунин инъикосгари забон, хат ва ҳунарҳои волои китобдорӣ, хушнависӣ, коғазсозӣ, рангсозӣ, муқовасозии тоҷикон ва ниёгони тоҷикон мебошад, ки то имрӯз намунаҳои гуногуни он боқӣ мондаанд.
АКС: Осорхонаи миллии Тоҷикисон
ИСТИҚЛОЛИ ДАВЛАТИИ ТОҶИКИСТОН-ЗАМИНАИ ҲИФЗУ ГУСТАРИШИ АРЗИШҲОИ МИЛЛӢ. Дар ҳошияи фармони Президенти Тоҷикистон «Дар бораи ҷашн гирифтани 40-солагии Истиқлоли давлатии Ҷумҳурии Тоҷикистон»
Намоиши «Достони Сиёвуш» дар Москва ба саҳна гузошта шуд
Дар назди чор муассисаи таълимии шаҳри Ҳисор биноҳои иловагӣ сохта мешаванд
Намоишномаи мазҳакавии таҳти унвони «Хоҳ биёӣ, хоҳ наё» дар Москва ба саҳна гузошта шуд
Ҳайти эҷодии Тоҷикистон дар Фестивали V байналмилалии театрӣ дар Ашқобод ҳунари миллии театриро муаррифӣ намуд
«БАРНОМАИ ДАВЛАТИИ РУШДИ МУАССИСАҲОИ СОҲАИ МАОРИФИ ВИЛОЯТИ ХАТЛОН». Дар доираи он бунёди 165 иншоот ба нақша гирифта шудааст
Хобгоҳи Коллеҷи омӯзгории шаҳри Ҳисор баъд аз навсозӣ ба истифода дода шуд
Бузургтарин ситораҳои санъати Тоҷикистон дар Театри ба номи Лоҳутӣ тарбия ёфтаанд
РӮЗИ ТЕАТРИ ТОҶИК. Дар Тоҷикистон беш аз 20 театри халқӣ фаъолият мекунад
Дар Душанбе бахшида ба Рӯзи театр ҳамоиш доир гардид
Дар Душанбе намоиши асарҳои рассомони Тоҷикистону Чин доир гардид
