Дар Вазорати молия 21 созишномаи қарзию грантӣ ба имзо расонида шуд

ДУШАНБЕ, 08.08.2021 /АМИТ «Ховар»/. Дар доираи татбиқи лоиҳаҳои давлатии сармоягузорӣ маблағҳои қарзӣ дар ҳаҷми 931,5 млн сомонӣ ва грантӣ 1163,6 млн сомонӣ, дар маҷмӯъ 2095,1 млн сомонӣ аз худ карда шудаанд, ки ба 121,9 фоизи нақша баробар мебошад. Дар ин бора аз Вазорати молияи Ҷумҳурии Тоҷикистон хабар доданд.

Аз ин ҳисоб, барои рушди соҳаҳои ҳокимият ва идоракунии давлатӣ- 24,6 млн сомонӣ, мудофиа- 13,4 млн сомонӣ, мақомоти ҳифзи ҳуқуқ ва тартиботи ҳуқуқӣ- 3,8 млн сомонӣ, маориф- 83,5 млн сомонӣ, тандурустӣ- 75,9 млн сомонӣ, хоҷагии манзилию коммуналӣ- 178,5 млн сомонӣ, фарҳангу варзиш- 8,7 млн сомонӣ, энергетика- 922,5 млн сомонӣ,  кишоварзӣ-  189,3 млн сомонӣ ва  нақлиёт- 594,5 млн сомонӣ равона карда шудааст.

Бо мақсади ҷалби маблағҳои иловагӣ барои рушди соҳаҳои иҷтимоию иқтисодии ҷумҳурӣ ҳамкорӣ бо шарикони рушд ва дигар созмонҳои байналмилалии молиявӣ тақвият дода шуда, барои амалӣ намудани лоиҳаи давлатии сармоягузорӣ 21 созишномаи қарзию грантӣ ба маблағи умумии 410,9 млн. доллари амрикоӣ ба имзо расонида шуд.

 АКС аз АМИТ «Ховар»