Консули генералии Тоҷикистон дар Екатеринбург дар рӯнамоии Нишасти ҷаҳонии варзиш ва тиҷорат ширкат варзид

ДУШАНБЕ, 24.08.2021 /АМИТ «Ховар»/. Консули генералии Ҷумҳурии Тоҷикистон дар минтақаи Урали Федератсияи Русия Зафар Сайидзода 24 август дар рӯнамоии Нишасти ҷаҳонии варзиш ва тиҷорат, ки дар шаҳри Екатеринбург дар майдони соли 1905, дар павилйони “SportAccord” баргузор шуд, ширкат варзид. Дар ин бора Консулгарии генералии Ҷумҳурии Тоҷикистон дар минтақаи Урали Русия хабар медиҳад. 

Дар маросими муаррифӣ роҳбари Екатеринбург Алексей Орлов, Вазири тарбияи ҷисмонӣ ва варзиши вилояти Свердловск Леонид Рапопорт маърӯза карданд. Роҳбари самти рушди тиҷорат дар Ассотсиатсияи “SportAccord” Малколм Ричард Хардман ба таври видеоӣ баромад кард.

Миёни намояндагони давлатҳои хориҷӣ ва ҳайати дипломатии дохилӣ табодули афкор сурат гирифт.

Зикр гардид, ки нишасти мазкур калонтарин дар ҷаҳон буда, чорабинии ҳарсолаи шашрӯзаи варзишӣ ба шумор меравад, ки дар он намояндагони зиёда аз 100 федератсияҳои байналмилалии варзишӣ, ташкилоту корхонаҳое, ки ба рушди варзиш машғуланд, кумитаҳои ташкилӣ, воситаҳои ахбори омма, инчунин варзишгарони боқувват иштирок мекунанд.

Нишасти ҷаҳонии варзиш ва тиҷорат аз 15 то 20 майи соли 2022 дар Екатеринбург баргузор мешавад.

АКС: Консулгарии генералии Ҷумҳурии Тоҷикистон дар минтақаи Урали Русия