Дастаи «Душанбе-1» ғолиби ҷойи аввали Мусобиқаи ҷумҳуриявии шиноварӣ гардид

ДУШАНБЕ, 28.09.2021 /АМИТ «Ховар»/. Бахшида ба 30-солагии Истиқлолияти давлатӣ дар Маҷмааи ҳавзҳои шиноварии «20-солагии Истиқлолияти Тоҷикистон»-и шаҳри Хуҷанд бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Федератсияи миллии шиноварии Тоҷикистон ва дастгирии Мақомоти иҷроияи ҳокимияти давлатии вилояти Суғд миёни варзишгарони шаҳру ноҳияҳои кишвар Мусобиқаи ҷумҳуриявии шиноварӣ  баргузор гардид, хабар медиҳад шореҳи варзиши АМИТ «Ховар» Меҳрони Қурбон бо истинод ба Федератсияи шиноварии  Ҷумҳурии Тоҷикистон. 

          Дар мусобиқаи мазкур беш аз 50 нафар варзишгарон аз шаҳри Душанбе ва вилояти Суғд иштирок намуда, дар намудҳои гуногун миёни ҳам қувваозмоӣ намуданд.

Дар натиҷа ҷои аввал насиби дастаи «Душанбе-1», ҷои дуюм насиби «Душанбе-2»  ва ҷои сеюм насиби дастаи «Суғд» гардид. Дар фарҷоми мусобиқа ба ғолибон туҳфаҳои хотиравӣ супорида шуданд.