Ҳазорон нафар шаҳрвандони Тоҷикистон дар Русия ба «афви муҳоҷиратӣ» дохил шудаанд

ДУШАНБЕ, 14.10.2021 /АМИТ «Ховар»/. Дар Русия 300 ҳазор муҳоҷир мавриди афв қарор гирифтанд, ки нисфи онҳо шаҳрвандони Тоҷикистон ва нимаи дигар шаҳрвандони Узбекистон мебошанд. Акнун онҳо метавонанд барои кор ба Русия баргарданд, хабар медиҳад АМИТ «Ховар».

 Ба гуфтаи коршиносон, ин тасмим бинобар нарасидани коргарон дар мамлакат гирифта шудааст.

«Тавассути музокироти тӯлонӣ ва хеле мураккаб мо тавонистем дар бораи афви 150 ҳазор нафар шаҳрванди Тоҷикистон ва 150 ҳазор шаҳрванди Узбекистон тавофуқ кунем»,-хабар дод президенти Федератсияи муҳоҷирони Русия Вадим Коженов.

Ҳамзамон ӯ тавзеҳ дод, ки агар шахс аз ҷониби суд аз кишвар хориҷ шуда бошад, пас ӯ, бешубҳа, мавриди афв қарор нагирифтааст. Агар ин мамнӯъиятро Вазорати корҳои дохилӣ гузошта бошад, пас эҳтимоли дохил шудан ба афв вуҷуд дорад.

Ба гуфтаи ҳуқуқшиноси муҳоҷиратии портали migrant.mobi Насим Абдуллоев, ин тасмим барои он гирифта шуд, ки Русия ба муҳоҷирони корӣ ниёз дорад. Аз сабаби норасоии коргарон дар бахшҳои сохтмон ва кишоварзӣ бозистии шадиди корҳо оғоз ёфт. Бисёр корхонаҳо муфлис шуданд, бинобар ин ҳоло онҳо кӯшиш доранд, ки бо ҳар роҳ муҳоҷиронро ба кишвар ворид кунанд.

«Тааҷҷубовар аст, ҳатто он шахсоне, ки барои 10 сол вурудашон ба ин давлат манъ шуда буд, мавриди авф қарор гирифтаанд. Ин ҷазои нисбатан вазнин аз ҷониби давлат аст»,-гуфт Абдуллоев.

Коршинос оид ба муҳоҷирати меҳнатӣ ва раиси шӯрои коршиносони КҶ «Аксиома» Дмитрий Исповедников бо чунин ақида мувофиқ аст, ки ин тасмим мустақиман ба норасоии қувваи корӣ марбут аст, хусусан дар мавриди Вазорати сохтмон. Гузашта аз ин, тибқи барномаи ҷалби муташаккилона барои иншооти сохтмонӣ ҳоло 10 ҳазор нафарӣ ворид карда мешаванд.

Омили дигар ба манфиати чунин афрод он аст, ки онҳо аллакай дар Русия кор кардаанд. Ҳоло сухан дар бораи он муҳоҷироне меравад, ки барои ҷиноятҳои ночиз аз кишвар хориҷ карда шудаанд.

«Онҳо аллакай таҷрибаи дар Русия кору зиндагӣ кардан доранд. Онҳо назар ба ҳамтоёни худ, ки чунин таҷриба надоранд, имконияти бештар барои ҳамгироӣ доранд. Агар онҳо тибқи барномаи муташаккилонаи ҷалбкунӣ ворид карда шаванд, ин эҳтимоли такрор шудани баъзе қонуншиканиҳоро коҳиш медиҳад»,-илова намуд Исповедников.

АКС: © Sputnik / Сергей Пивоваров