Дар Тоҷикистон 188 ҳазор тонна пахта ҷамъоварӣ карда шуд

ДУШАНБЕ, 07.10.2021 /АМИТ «Ховар»/. Дар Тоҷикистон то 5 октябри соли 2021  188 ҳазор тонна пахтаи хом ҷамъоварӣ карда шуд. Бино ба иттилои агентии «АП», ин нисбат ба ҳамин давраи соли гузашта 23 ҳазор тонна бештар аст.

 Ҳиссаи асосии ҳосили ҷамъоваришуда ба хоҷагиҳои вилояти Хатлон рост меояд, ки дар онҳо зиёда аз 133 ҳазор тонна пахта ҷамъоварӣ шудааст, хабар медиҳад маркази матбуоти Вазорати кишоварзии Ҷумҳурии Тоҷикистон .

Дар вилояти Суғд, ки дертар ба чидани пахта шурӯъ карданд, тақрибан 53 ҳазор тонна, дар шаҳру навоҳии тобеи марказ то 2 ҳазор тонна пахта ҷамъоварӣ карда шудааст.

Тоҷикистон соли 2021 ба нақша гирифтааст, ки аз майдони 174 ҳазору 155 гектар беш аз 400 ҳазор тонна пахтаи хом истеҳсол кунад.

Имсол ба кормандон барои ҷамъоварии 1 кг пахта 1 сомонӣ дода мешавад, соли гузашта ба онҳо 50 дирамӣ дода шуд.

Худи кишоварзон пахтаро ба ширкатҳои харидор бо нархи 8-9 сомонӣ мефурӯшанд, ки қаблан нархаш 4-5 сомонӣ буд.

Ба гуфтаи коршиносон, арзиши тавлиди 1 кг пахта бо назардошти болоравии нархи хадамоти таҷҳизот ва нуриҳо қариб 9 сомониро ташкил медиҳад.

                                                    АКС аз бойгонӣ