Маҳсулоти «Парки нассоҷии шаҳри Кӯлоб» ба Русия, Туркия ва Қазоқистон содирот карда мешавад

Октябрь 19, 2021 11:19

КӮЛОБ, 19.10.2021 /АМИТ «Ховар»/. Ҷамъияти  дорои масъулияти маҳдуди «Ваҳдат Текстайл», ки  корхонаи истеҳсоли  ҷӯроб дар ноҳияи Шоҳмансури  шаҳри Душанбе  ва корхонаи истеҳсоли дастпӯшак дар ноҳияи Ёвони вилояти Хатлонро дар ихтиёр дорад, дар шарикӣ бо Ҳукумати Ҷумҳурии Тоҷикистон дар шаҳри Кӯлоб  корхонаи  истеҳсоли ҷӯробҳои ҶДММ «Парки нассоҷии шаҳри Кӯлоб»-ро  таъсис дод, иттилоъ медиҳад мухбири минтақавии АМИТ «Ховар».

Рӯзҳои  наздик ба корхона 150 адад  дастгоҳҳои  бофандагии  ҷӯроб  ворид карда мешаванд. Иқтидори истеҳсоли корхонаро 34 миллион ҷуфт ҷӯробҳои босифати пахтагӣ аз ашёи хоми маҳаллӣ  ташкил дода,  тибқи нақша  70%-и ҳаҷми  мазкур  ба хориҷа, аз ҷумла ба Федератсияи Русия, Туркия, Қазоқистон ва дигар кишварҳо содирот карда мешавад.

Мақсад аз таъсис додани ҶДММ «Ваҳдат Текстайл»- ин коркарди  ниҳоии ашёи хоми  маҳаллӣ  ва истеҳсоли  маҳсулот  аз ҳисоби  пахтаи ватанӣ  мебошад, ки имкон  медиҳад 80% -и  ҷӯробҳои корхона  аз пахта  таркиб ёбанд ва ба ин васила  таваҷҷуҳи  харидорони ватаниву  хориҷӣ  ба он бештар ҷалб гардад. 

Директори корхонаи мазкур  Орзу Холиқов  мегӯяд, ки лоиҳаи  корхонаи истеҳсоли  ҷӯробҳои ҶДММ «Парки нассоҷии шаҳри Кӯлоб» ба маблағи 100 миллион сомонӣ амалӣ гардида,  дар ҳолати пурра  ба кор даромадан ва  ворид гардидани ашёи хом   зиёда аз 450 нафар  сокинони маҳаллӣ, хусусан  занон  бо ҷойи кори доимӣ  таъмин карда мешаванд. Дар корхонаи истеҳсоли ҷӯробҳо  250  дастгоҳи  худкори бофанда, 5 дастгоҳи дӯзандаи нӯги ҷӯроб, 6 дастгоҳи  дарзмол насб гардида,  таҷҳизот  ва   технология  аз ширкатҳои  машҳури Италия, Туркия ва Чин  харидорӣ шуда, имкони истеҳсоли маҳсулоти  баландсифату  рақобатпазирро  на танҳо барои  бозори дохилӣ,  балки бозори ҷаҳонӣ  низ медиҳад.


Муассисони ҶДММ «Ваҳдат Текстайл» соҳибкорон  Акбар Ғуломов ва Илҳом Мирзоев  бо мақсади иҷрои  дастуру супоришҳои  Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  нақша доранд  бо ҷалби сармояи худӣ  дар сиёсати  пешгирифтаи  Ҳукумати  Ҷумҳурии Тоҷикистон дар самти коркарди ниҳоии ашёи хоми  маҳаллӣ  ва ташкили кластер дар соҳаи нассоҷӣ саҳм гузоранд.

 

АКСҲО: АМИТ «Ховар»

Октябрь 19, 2021 11:19

Хабарҳои дигари ин бахш

Дар Душанбе масоили самаранокии низоми идоракунии давлатӣ ва волоияти қонун баррасӣ шуд
Миёни Ҳукумати Ҷумҳурии Тоҷикистон ва Корпоратсияи байналмилалии молиявӣ Созишномаи ҳамкорӣ ба имзо расид
Дар Тоҷикистон истеҳсоли картошка нисбат ба ҳамин давраи соли гузашта 144 ҳазор тонна зиёд гардидааст
МУЖДАИ ЗАФАР. Кишоварзони ноҳияи Кӯшониёни вилояти Хатлон нақшаи истеҳсоли пахтаро иҷро намуданд
Иля Федоров, директори департаменти Вазорати рушди иқтисоди ФР: Иқтидори тиҷоратии Русия ва Тоҷикистон ба тавре ки мебояд, истифода нашудааст
ИМРӮЗ — РӮЗИ БАЙНАЛМИЛАЛИИ САРФАИ ЭНЕРГИЯ. Коршиноси АМИТ «Ховар» мегӯяд, ки чаро он ба Тоҷикистон ин қадар зарур аст
Дар Душанбе Муколамаи миллии сатҳи баланд оид ба низоми озуқаворӣ дар Ҷумҳурии Тоҷикистон баргузор шуд
Вазири кишоварзии Тоҷикистон дар ноҳияи Мастчоҳ бо ҷараёни ҷамъоварии пахта ва коркарди он шинос гардид
Таҳкими ҳамкории Тоҷикистон ва Туркия дар бахши ҳифзи муҳити зист дар Глазго баррасӣ шуд
Дар Душанбе Форуми занони соҳибкор гузаронида мешавад
IFAD дар Тоҷикистон бо назардошти масъалаҳои иқлим лоиҳаи нав татбиқ менамояд
ОМОДАГӢ БА ЗИМИСТОН. Шаҳру ноҳияҳои вилояти Хатлон барои хуб гузаронидани фасли сармо дастури мушаххас гирифтанд