ОГОҲИИ АГЕНТИИ ОБУҲАВОШИНОСӢ: 21-22 октябр дар Тоҷикистон ҳаво номусоид шуда, борон ва дар доманакӯҳҳо барф меборад

ДУШАНБЕ, 19.10.2021 /АМИТ «Ховар»/.  21-22 октябр дар ҷумҳурӣ номусоид шудани вазъи обу ҳаво пешбинӣ шуда, боридани борон ва дар  ноҳияҳои алоҳидаи кӯҳӣ ва доманакӯҳ гузариши борон ба барф дар назар аст, иттилоъ медиҳад Агентии обуҳавошиносии  Кумитаи ҳифзи муҳити зисти назди Ҳукумати Ҷумҳурии Тоҷикистон ба АМИТ «Ховар».

Дар ин рӯзҳо дар ноҳияҳои алоҳидаи вилоятҳои Хатлон, Суғд, ноҳияҳои тобеи ҷумҳурӣ ва Вилояти Мухтори Кӯҳистони Бадахшон шамол бо суръати то 17-22 метр дар як сония вазида, дар ноҳияҳои ҷанубии кишвар чангу ғубор ба амал меояд.

Инчунин дар ҳавзаи дарёҳои Вахш, Зарафшон, Кофарниҳон ва дарёҳои Ёхсӯ, Қизилсӯ (ҷанубӣ) баландшавии сатҳи об аз эҳтимол дур нест.

22-23 октябр ҳарорати рӯзонаи ҳаво то 7-12 дараҷа паст мешавад.

АКС аз АМИТ «Ховар»