СИТОРАҲОИ САНЪАТИ ТОҶИК ДАР САҲНАИ ПАРИЖ. Дар Қароргоҳи ЮНЕСКО дар пойтахти Франсия Рӯзҳои фарҳанги Тоҷикистон баргузор мегарданд

Октябрь 12, 2021 15:37

ДУШАНБЕ, 12.10.2021. /АМИТ «Ховар»/. 14 октябр Рӯзҳои фарҳанги Ҷумҳурии Тоҷикистон дар қароргоҳи ЮНЕСКО дар Париж доир мегарданд, ки дар он ҳайати иборат аз 82 нафар ҳунарпешагон ва гурӯҳҳои ҳунарӣ таҳти  роҳбарии Вазири фарҳанги Ҷумҳурии Тоҷикистон Зулфия Давлатзода ва сардори Раёсати санъати Вазорати фарҳанги мамлакат Мирзоолим Саидов санъату ҳунари миллии тоҷикро муаррифӣ менамоянд. Дар ин бора  ба хабарнигори АМИТ «Ховар» дар Вазорати фарҳанги Ҷумҳурии Тоҷикистон  иттилоъ  доданд.

Дар барномаи фарҳангӣ суруду оҳангҳои тоҷикӣ, фаронсавӣ ва италиявӣ аз ҷониби ҳунармандони хушсадо Давлатманди Хол, Адҳам Холиқов, Файзалӣ Ҳасанов, Раҳматулло Ҳошимов, Давлат Назрӣ, Нигина Амонқулова, Муҳаммадрафии Кароматулло, Фотима Машрабова, Шарофат Усмонзода, Ситораи Кароматулло, Тахмина Ниёзова, Фирдавс Ҳошимов, Амирҷон Рӯзиев, Ҷаннатулло Абдуллоев, ансамблҳои созҳои миллӣ, инчунин рақсҳои миллии тоҷикӣ дар иҷрои гурӯҳҳои рақсии «Лола», «Зебо», «Ҷаҳоноро» ва «Гулрез» пешниҳод мегарданд.

Дар даромадгоҳи қароргоҳи ЮНЕСКО  намунаҳои ҳунарҳои мардумӣ ва либосҳои миллӣ, ки фарогири таъриху фарҳанги пурғановати миллати тоҷик мебошанд, ба намоиш гузошта мешаванд. Бояд гуфт, ки либосҳои миллӣ ва ҳунарҳои мардумиро Муфарраҳ Муҳаббатов ва тарроҳ Хуршед Сатторов пешниҳод менамоянд.

Мавриди зикр аст, ки бори охир  санъаткорони маъруфи тоҷик ҳанӯз соли 2005 дар чунин як ҳамоиш ширкат ва дар саҳнаи Париж дар ҳузури Президенти Тоҷикистон Эмомалӣ Раҳмон ва Президенти вақти Франсия Жак Ширак ҳунарнамоӣ карда буданд.

Ёдовар мешавем, ки  пагоҳ дар Музеи Гимей — Осорхонаи  санъати Шарқи   шаҳри Париж бузургтарин намоиши осори таърихии марбут ба ниёгони тоҷикон таҳти унвони «Тоҷикистон-кишвари дарёҳои тиллоӣ» оғоз мегардад, ки то 10 январи соли 2022 идома  хоҳад ёфт.

                                                                        Фирӯза ДАВЛАТЗОДА,
                                                                                   АМИТ “Ховар”

                                                                                             АКСҲО аз манбаҳои боз

Октябрь 12, 2021 15:37

Хабарҳои дигари ин бахш

Дар Москва дар бораи адиб ва синамогари тоҷик Абдурофеъ Рабизода китоб ба нашр расид
Дар Роғуну Турсунзодаю Тоҷикобод Иди Меҳргон — ҷашни ҳосилот пуршукӯҳ таҷлил гардид
Муовини Вазири фарҳанг Давлат Сафарзода: «Новобаста аз дастовардҳо имрӯз дар фаъолияти муассисаҳои фарҳангии Тоҷикистон мушкилот зиёданд»
То моҳи сентябри соли оянда дар Душанбе ва Турсунзода ду мактаби таҳсилашон ба забони русӣ ба истифода дода мешаванд
Беҳтарин муаллимони ГИТИС дар кишварҳои ИДМ дарс мегузаронанд ва ба наздикӣ ба Душанбе меоянд
Адиби шинохта Ҳаёт Неъмати Самарқандӣ даргузашт
Намояндаи Тоҷикистон дар Анҷумани XIII Ассотсиатсияи тадқиқоти байналмилалии Русия ширкат варзид
Дар Душанбе таҳти унвони «Тандурустӣ ҳамчун омили муҳими амнияти иҷтимоӣ» ҳамоиши илмӣ доир мегардад
«СЕ ШОҲКОР». Романҳои оламшумули нависандагони машҳури ҷаҳонӣ бо забони тоҷикӣ нашр шуданд
КИНО НЕРУИ АҚЛОНИВУ ЗЕҲНИИ ҶОМЕАРО БАЛАНД МЕБАРДОРАД. Андешаҳои коршиносони соҳа дар ин маврид
Шариф Ҳамдампур: «Ҳодисае, ки сад сол қабл ба сари тоҷикони Осиёи Миёна омада буд, ба сари тоҷикони Афғонистон омад»
«ФАРЗАНДИ ТОҶИКИСТОНАМ». Латофат Кенҷаева ва Гулчеҳра Маҳмадиева ғолибони асосии ин озмун гардиданд