Дар Душанбе бахшида ба Рӯзи байналмилалии маъюбон ҳамоиш доир мешавад

ДУШАНБЕ, 30.11.2021 /АМИТ «Ховар»/.  3-4 декабр дар шаҳри Душанбе бахшида ба Рӯзи байналмилалии маъюбон  бо иштироки намояндагони сохтору кумитаҳои дахлдори давлатӣ ва намояндагони ташкилоти ҷамъиятии маъюбон ҳамоиш доир мегардад. Мавзӯи имсолаи Рӯзи байналмилалии маъюбон  аз ҷониби Созмони Милали Муттаҳид «Роҳбарӣ ва иштироки шахсони маъюб дар роҳи ташкили ҷаҳони фарогир, дастрас ва устувор пас аз COVID-19» эълон гардидааст.

Тавре раиси Иттиҳодияи миллии маъюбони Тоҷикистон Асадулло Зикрихудоев ба АМИТ «Ховар» иттилоъ дод, ҳамоиши мазкур  бо дастгирии Департамент оид ба масъалаҳои иқтисодӣ ва иҷтимоии СММ (United Nations Departament of Economic and Social Affairs (UNDESA)) баргузор шуда, мақсад аз он бори дигар баррасӣ ва муайян намудани ҷараёни амалишавии «Нақшаи миллии амалҳо оид ба омодагии Ҷумҳурии Тоҷикистон барои тасдиқ ва амалинамоии Конвенсия дар бораи ҳуқуқҳои маъюбон»  мебошад.

Баъди ба имзо расидани Конвенсияи ҳуқуқи маъюбон аз ҷониби Асосгузори сулҳу ваҳдати миллӣ -Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  аз 27 феврали соли 2020 бо қарори Ҳукумати Ҷумҳурии Тоҷикистон «Нақшаи миллии амалҳо оид ба омодагии Ҷумҳурии Тоҷикистон барои тасдиқ ва амалинамоии Конвенсия дар бораи ҳуқуқҳои маъюбон» қабул шуд, ки ҳоло дар ҷараёни татбиқ қарор дорад.

Ёдовар мешавем, ки ҳамасола дар тамоми дунё 3 декабр Рӯзи байналмилалии  маъюбон   таҷлил мегардад. Ҳадафи он — мусоидат ба ҳуқуқҳои маъюбон дар ҳамаи соҳаҳои ҳаёти ҷамъиятӣ, инчунин ҷалби таваҷҷуҳи кулли ҷомеа ба мушкилоти маъюбон мебошад.

АКС аз манбаъҳои боз