Доир ба раванди мутобиқсозии барномаҳои таълимӣ ба соҳаи нассоҷӣ ва дӯзандагии Тоҷикистон машварат доир шуд

Ноябрь 23, 2021 11:53

ДУШАНБЕ, 23.11.2021. /АМИТ «Ховар»/. 22 ноябр дар Донишгоҳи давлатии Данғара бо ташаббуси донишгоҳ ва Шӯрои Иттифоқи рушди бахши хусусии Тоҷикистон дар мавзӯи «Раванди мутобиқсозии барномаҳои таълимӣ барои соҳаи нассоҷӣ ва дӯзандагии Ҷумҳурии Тоҷикистон»  машварат баргузор гардид,  хабар дод ба АМИТ «Ховар» сардори бахши  гурӯҳи таҳлилии таъмини бехатарии иттилоот ва кор бо сомонаҳои донишгоҳ Муҳаммад Шораҳимзода.   

Дар кори он ректори Донишгоҳи давлатии Данғара, профессор Нуралӣ Шоҳиён, раиси Шӯрои Иттифоқи рушди бахши хусусии Тоҷикистон Файзалӣ Раҷабов, менеҷери “Барномаҳои ҷаҳонии нассоҷӣ ва дӯзандагӣ” Саидмуъмин Камолов ва намояндагони Вазорати маориф ва илми Ҷумҳурии Тоҷикистон, Вазорати саноат ва технологияҳои нави Ҷумҳурии Тоҷикистон, Вазорати меҳнат, муҳоҷират ва шуғли аҳолии  Ҷумҳурии Тоҷикистон, ҳамчунин устодони Донишгоҳи технологии Тоҷикистон, Донишгоҳи техникии Тоҷикистон ба номи академик М. Осимӣ ва  меҳмонон аз Донишкадаи муҳандисӣ ва технологии шаҳри Намангони  Ҷумҳурии Узбекистон  ширкат намуданд.

Нуралӣ Шоҳиён   зикр намуд, ки машварати мазкур бо мақсади татбиқи ҳадафи чоруми стратегии Ҳукумати Ҷумҳурии Тоҷикистон- саноатикунонии босуръати мамлакат роҳандозӣ гардид.    Яке аз самтҳои афзалиятноки саноатикунонии босуръати иқтисодиёти Тоҷикистон — ин коркарди нахи пахтаи истеҳсоли ватанӣ то маҳсулоти рақобатпазири ниҳоии содиротӣ ва воридотивазкунанда, рушди соҳаҳои ресандагӣ, бофандагӣ, кешбофӣ ва дӯзандагӣ мебошад. Саноати сабук дар Тоҷикистон яке аз соҳаҳои афзалиятнок ба ҳисоб рафта, барои рушду пешрафт ва некуаҳволии кишвар муҳим арзёбӣ мегардад.

Иштирокчиён оид ба рушду пешрафти соҳа ва мушкилоти ҷойдошта, омилҳои такондиҳанда ва самаранок истифода бурдани имконоти мавҷуда табодули афкор намуданд. Гуфта шуд, ки хусусияти фарқкунандаи талаботи бозори имрӯзаи саноати сабук ва натиҷаҳои пешакии тадқиқот оид ба мавқеъгирии маркетингии маснуоти нассоҷии дорои нақшу нигор дар бозорҳои хориҷӣ нишон медиҳад, ки ин навъи маҳсулот  харидори зиёд пайдо намудааст.  Имрӯз дар Ҷумҳурии Тоҷикистон заминаҳои уствори рушди ин соҳа мавҷуд буда, имкони истифодаи пурраи захираҳои ашёи хом ва истеҳсоли маснуоти ҷавобгӯ ба талаботи замони муосир фароҳам оварда мешавад. Саноати нассоҷӣ истеҳсолоти бисёрсамта буда, дар ҷумҳурии мо амалан 4 зинаи он вуҷуд дорад, ки инҳо   “истеҳсолоти нахҳои табиӣ дар натиҷаи коркарди аввалин”, “истеҳсолоти ресандагӣ”,  “истеҳсолоти бофандагӣ, кешбофӣ  ва маводи нобофт” ва “истеҳсолоти рангомезӣ ва дӯзандагӣ” мебошанд.

Дар идомаи кори ҳамоиш устодони Донишкадаи муҳандисӣ ва технологии шаҳри Намангони  Ҷумҳурии Узбекистон низ доир ба раванди таълиму тарбия ва  омода кардани мутахассисони соҳаи нассоҷӣ ва дӯзандагӣ  изҳори  назар намуда, дар оянда ба роҳ мондани ҳамкории судмандро  дар самти табодули таҷрибаи донишҷӯёни ин ихтисосҳо муҳим арзёбӣ карданд.

Дар доираи машварат иштирокчиён аз озмоишгоҳ, лоиҳаҳои эҷодӣ ва инноватсионии донишҷӯёни факултети муҳандисӣ ва технологияҳои муосири истеҳсолӣ ва намоиши маҳсулоти саноатии Маҷмааи нассоҷии ҶСП «Ҷунтай – Данғара — Син Силу – Текстил» аз наздик дидан намуданд.

Ёдовар мешавем, ки Маҷмааи нассоҷии ҶСП «Ҷунтай Данғара Син Силу Текстил» дар ноҳияи Данғара бузургтарин маҷмааи коргоҳҳои нассоҷӣ дар Осиёи Марказӣ ба шумор рафта,  19 декабри соли 2014 ба сохтмони он расман оғоз бахшида шуд. 31 августи соли 2016 навбати аввали он  бо иштироки Асосгузори сулҳу ваҳдати миллӣ-Пешвои миллат, Президенти Тоҷикистон муҳтарам Эмомалӣ Раҳмон   мавриди баҳрабардорӣ қарор гирифт, ки имрӯзҳо фаъолияти назаррас дорад.  Ин маҷмааи муштараки Тоҷикистону Чин буда, коргоҳҳои саноатии он бо ворид намудани навтарин технология аз ширкатҳои дорои шуҳрати ҷаҳонӣ, ба мисли  Иёлоти Муттаҳидаи Амрико, Италия, Швейтсария, Олмон ва Чин бунёд ёфтаанд.

                                                     Аксҳо  аз Донишгоҳи давлатии Данғара

Ноябрь 23, 2021 11:53

Хабарҳои дигари ин бахш

Дар мақомоти Ваколатдор оид ба ҳуқуқи инсон доир ба тавзеҳи Паёми Президенти Тоҷикистон ҳамоиш доир шуд
Дар шаҳри Москва масъалаҳои ҳамкории кишварҳои Осиёи Марказӣ дар соҳаи обу энергетика, муҳити зист ва иқлим баррасӣ шуданд
Ба муҳоҷирони меҳнатии тоҷики дар боздоштгоҳи муваққатии шаҳри Екатеринбург қарордошта кумак расонида шуд
ОБУ ҲАВО: Имрӯз дар Тоҷикистон ҳавои тағйирёбандаи бебориш дар назар аст
Дар даври шаҳрии олимпиадаи фаннии хонандагони мактабҳои таълимии шаҳри Душанбе 3471 нафар иштирок намуданд
Миёни Донишгоҳи техникии Тоҷикистон ва Донишгоҳи касбӣ-техникии идораи шаҳрсозии Тянҷини Чин Ёддошти тафоҳум ба имзо расид
ОБУ ҲАВО: Имрӯз дар Тоҷикистон ҳавои тағйирёбандаи асосан бебориш дар назар аст
«Шарҳу тавзеҳи Кодекси андоз дар таҳрири нав». Кумитаи андоз бо мақсади огоҳонидани аҳолӣ саҳифаи махсуси Телеграм ва Viber боз намуд
Дар роҳҳои кӯҳии Тоҷикистон сатҳи баланди тармафароӣ боқӣ мемонад
ОБУ ҲАВО: Имрӯз дар ноҳияҳои алоҳидаи Тоҷикистон бориши борон ва барф дар назар аст
ОБУ ҲАВО: Имрӯз дар шаҳри Душанбе ҳаво 10+12 дараҷа гарм мешавад
Кумитаи иҷроияи ҲХДТ дар вилояти Хатлон ба оилаҳои ниёзманди шаҳри Бохтар кумак расонид