ИМРӮЗ – РӮЗИ УМУМИҶАҲОНИИ ШАҲРСОЗӢ. Дар Душанбе муассисаҳои таълимии замонавӣ бунёд мегарданд

Ноябрь 8, 2021 09:27

ДУШАНБЕ, 8.11.2021. /АМИТ «Ховар»/. Шурӯъ аз соли 1949 дар як зумра  давлатҳои  ҷаҳон 8 ноябр   Рӯзи умумиҷаҳонии шаҳрсозӣ   таҷлил мегардад.  Ин сана бори аввал аз ҷониби хатмкардаи Институти урбанизми Париж, профессори   Донишгоҳи  Буэнос-Айрес  Карлсон Мария-делла-Паолера   пешниҳод гардидааст. Ҳадаф  аз таҷлили ин рӯз рушди шаҳрҳо ва  фароҳам овардани шароити зист барои сокинон мебошад. Мувофиқи омори СММ,  то соли 2050 60 фоизи  аҳолии кураи Заминро сокинони шаҳр  ташкил хоҳанд дод, аз ин рӯ бунёд гардидани иншооти таъйиноти гуногун дар пойтахти Тоҷикистон-шаҳри Душанбе айни муддаост.

Бо истифода аз ин маврид тасмим гирифтем мавзӯи бунёду навсозии муассисаҳои таълимии замонавии шаҳри Душанберо пайгирӣ намоем.

Тавре муовини якуми сардори Сарраёсати меъморӣ  ва шаҳрсозии шаҳри Душанбе Ҳусниддин Саидмуъминов ба хабарнигори АМИТ «Ховар» иброз дошт, Сарраёсат ҷиҳати иҷрои дастуру супоришҳои Раиси шаҳри Душанбе аз 4 октябри соли 2021 дар ҳамкорӣ бо соҳибкорон оид  ба истифода супоридани муассисаҳои таълимии нав дар шаҳри Душанбе тадбирҳои зарурӣ андешида истодааст.

Мавсуф иброз дошт, ки дар идомаи бунёдкорию созандагиҳо дар кӯчаҳои Яккачинор ва Дилкушои ноҳияи Фирдавсӣ низ сохтмони муассисаи таҳсилоти миёнаи умумии замонавӣ барои 1200 ҷойи нишаст дар назар дошта шудааст. Сохтмони муассисаи таълимии мазкур аз ҷониби ташкилоти лоиҳакаши ҶДММ «Саодат» роҳандозӣ шудааст.

Ҳамчунин корҳои сохтмонӣ дар муассисаи таълимӣ барои 1200 хонанда ва муассисаи томактабӣ барои 600 ҷой, воқеъ дар кӯчаи Рустам Амакӣ, №2 ноҳияи Фирдавсии шаҳри Душанбе ҷараён доранд.

Лоиҳаи иншооти мазкур аз ҷониби ташкилоти лоиҳакашии КВД ПИТЛ «Душанбешаҳрсоз» таҳия гардида, муҳлати ба истифодадиҳии он соли 2022 муқаррар шудааст.

Дар кӯчаи  Баҳовуддинови ноҳияи Синои пойтахт сохтмони литсейи хусусӣ барои 1280 хонанда бо хобгоҳ ҷараён дорад. Лоиҳаи  ин иншоот аз ҷониби Ташкилоти лоиҳакашии ҶДММ “Партнёр” таҳия гардидааст. Дар иншоот корҳои сохтмонӣ аз тарафи ташкилоти пудратии ҶДММ “Дақиқ” оғоз гардида, корҳои пардозгарӣ ва ободонӣ дар он идома доранд.

Сохтмони чунин мактаби хусусии замонавию муосир дар маҳаллаи Зарафшони ноҳияи Синои пойтахт низ ҷараён дорад. Сохтмони муассисаи мазкур  бо ташаббуси бевоситаи  Раиси шаҳри Душанбе  соли 2019 оғоз ёфта, муҳлати баистифодадиҳии бино охири соли 2022 муайян гардидааст.

Лоиҳаи иншооти мазкур аз ҷониби Ташкилоти лоиҳакашии ҶДММ «ГМ ва Партнёрҳо» таҳия шуда, дар иншоот корҳои сохтмонӣ аз тарафи Ташкилоти пудратии ҶДММ «Бунёдкор Шодӣ» ҷараён доранд.

Дар кӯчаи Яккатути ноҳияи Фирдавсии шаҳри Душанбе низ бо дастгирии соҳибкорон сохтмони муассисаи таълимӣ барои 1200 ҷойи нишаст дар назар дошта шуда, он бо тарҳи муосиру замонавӣ аз ҷониби фармоишгар ҶДММ «Тоҷ Меъмор» ва лоиҳакаш ҶДММ «Тарроҳ» ба истифода дода мешавад.

Бунёд гардидани мактабҳои замонавӣ маҳз ба хотири беҳтар шудани сатҳу сифати таълиму тарбия дар кишвар ба роҳ монда шуда, ба истифодадиҳии онҳо то охири соли 2022 марҳила ба марҳила дар назар дошта шудааст. Насли навраси имрӯза бояд аз чунин имконоти мусоиди фароҳамсохтаи давлат ва Ҳукумати мамлакат самаранок истифода намуда, барои боз ҳам беҳтар аз бар намудани донишҳои муосир ҳамаҷониба кӯшиш намояд.

Зарангези  ЛАТИФ,
АМИТ «Ховар»

Аксҳо аз бойгонии АМИТ «Ховар» ва сардори Сарраёсати меъморӣ  ва шаҳрсозии шаҳри Душанбе

 

Ноябрь 8, 2021 09:27

Хабарҳои дигари ин бахш

Дар шаҳраку маҳаллаҳои ноҳияҳои Душанбе озмунҳои «Беҳтарин ҳамсар» ва «Фарзанд – боғи падару модар» гузаронида шуданд
Дар асоси қарори Раиси шаҳри Душанбе дар пойтахт намоишгоҳи фурӯши либосҳои мактабӣ ва лавозимоти дарсӣ оғоз гардид
Доир ба муқовимат ба коррупсия чун кафили рушди соҳаи маориф конференсия баргузор гардид
Бахшида ба Рӯзи варзишгарони Тоҷикистон дар Душанбе Марафони велосипедронӣ баргузор мегардад
Дар шаҳри Душанбе 34-солагии Истиқлолияти давлатӣ ботантана ҷашн гирифта мешавад
Соли 2025 ба шаҳри Душанбе беш аз 450 ҳазор сайёҳ ворид гардид
Ба шаҳри Душанбе зиёда аз 11 ҳазор электромобил ворид карда шудааст
Соли 2025 дар шаҳри Душанбе 16 муассисаи таълимӣ ба истифода дода мешавад
НИШАСТИ МАТБУОТӢ. Дар ҳудуди шаҳри Душанбе сохтмони 7 эстакадаи нав оғоз меёбад
НИШАСТИ МАТБУОТӢ. Дар ноҳияи Сино сохтмон ва навсозии 279 иншоот ба нақша гирифта шудааст
НИШАСТИ МАТБУОТӢ. Корхонаҳои саноатии ноҳияи Фирдавсӣ ба маблағи зиёда аз 882 миллион сомонӣ маҳсулот истеҳсол намуданд
НИШАСТИ МАТБУОТӢ. Варзишгарони ноҳияи Исмоили Сомонии пойтахт дар мусобиқаҳо соҳиби 1620 медал шуданд