МУЖДАИ ЗАФАР. Кишоварзони ноҳияи Кӯшониёни вилояти Хатлон нақшаи истеҳсоли пахтаро иҷро намуданд

ДУШАНБЕ, 12.11.2021 /АМИТ «Ховар»/. Кишоварзони ноҳияи Кӯшониёни вилояти Хатлон  нақшаи чиниши пахтаро дар соли равон иҷро карда, ба хирмани мамлакат 25 ҳазору 544 тонна пахта ворид намуданд, иттилоъ доданд ба АМИТ «Ховар» аз шуъбаи иттилоотию таҳлилии дастгоҳи Раиси вилояти Хатлон.

Соли равон кишоварзони ноҳия дар майдони 11 ҳазору 320 гектар пунбадона кишт намуданд. Тибқи дурнамои солона, истеҳсоли пахта дар ноҳияи Кӯшониён 25 ҳазору 540 тонна муқаррар гардида буд, ки кишоварзон ҳосили барзиёд ҷамъоварӣ намуданд.

Ба зикри масъулин, баланд гардидани ҳосили пахта аз тавсияи олимону мутахассисони соҳа, инчунин дастрасӣ ба тухмиҳои аъолосифат ва сари вақт гузаронидани коркарду корҳои агротехникӣ вобаста мебошад.

Тибқи иттилои Вазорати кишоварзии мамлакат,  аз аввали мавсим то 5 ноябр  дар ҷумҳурӣ зиёда аз 366 ҳазор тонна пахта ҷамъоварӣ шудааст, ки   нисбат ба соли гузашта 16 949 тонна зиёд мебошад.

АКС аз шуъбаи иттилоотию таҳлили дастгоҳи Раиси вилояти Хатлон