Сарвазири Тоҷикистон Қоҳир Расулзода дар ҷаласаи Шӯрои сарони ҳукуматҳо-сарвазирони кишварҳои узви ИДМ иштирок намуд

ДУШАНБЕ, 12.11.2021. /АМИТ «Ховар»/. Имрӯз ҷаласаи Шӯрои сарони ҳукуматҳо-сарвазирони кишварҳои узви ИДМ тариқи видеоконференсия баргузор гардид, ки дар кори он Сарвазири Ҷумҳурии Тоҷикистон Қоҳир Расулзода иштирок ва суханронӣ намуд, хабар медиҳад АМИТ «Ховар».

Дар кори ҷаласаи Шӯро муҳимтарин масъалаҳои фарогири самтҳои гуногуни ҳамгироии давлатҳои аъзои иттиҳод, аз ҷумла, амният, иқтисоду тиҷорат, сармоягузорӣ, илму маориф, саноату кишоварзӣ, энергетика, гумрук, экология, тандурустӣ ва роҳу нақлиёт мавриди баррасӣ қарор дода шуданд.

Зимни баргузории ҷаласа таъкид гардид, ки дар замони паҳншавии бемории сироятии КОВИД-19 ба роҳ мондани фаъолияти неки кишварҳои узви ИДМ то андозае пеши роҳи пастравии иқтисодиёт дар минтақаро гирифта, барои муолиҷа ва пешгирии густариши бемории мазкур бо истифода аз таҷрибаи мутахассисони кишварҳои дӯст тадбирҳои мушаххас амалӣ гардиданд.

Сарвазири мамлакат Қоҳир Расулзода зимни баргузории ҷаласа таъкид намуд, ки Ҳукумати Ҷумҳурии Тоҷикистон бо кишварҳои узви ИДМ ҳамкории нек ва дӯстона ба роҳ мондааст, ки фарогири муҳимтарин принсипҳои дӯстӣ ва эътимоду эҳтироми ҷонибҳо мебошад.

Кори ҷаласаи навбатии Шӯрои сарони ҳукуматҳо-сарвазирони кишварҳои узви ИДМ бо қабули қарорҳо, ки ба рушди ҳамгироии кишварҳои узви ИДМ замина мегузорад, ба анҷом расид.

АКСҲО: АМИТ «Ховар»