Ба сарбозони қисмҳои ҳарбӣ, хизматчиён ва нафақагирони КҲФ ва МГ аз номи Сарвари давлат туҳфаҳои солинавӣ тақдим шуданд

ДУШАНБЕ, 29.12.2021 /АМИТ «Ховар»/.  Дар арафаи соли нав аз номи Сарфармондеҳи Қувваҳои Мусаллаҳи Ҷумҳурии Тоҷикистон, Президенти Тоҷикистон муҳтарам Эмомалӣ Раҳмон ба ҳайати шахсӣ, сарбозони  қисмҳои ҳарбӣ, ҳамчунин хизматчиён ва нафақагирони Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон туҳфаҳои солинавӣ ва  маводи ғизоӣ тақдим шуданд, хабар медиҳад АМИТ “Ховар” бо истинод ба Кумитаи ҳолатҳои фавқулода ва мудофиаи гражданӣ. 

28 декабр Раиси Кумитаи ҳолатҳои фавқулода, генерал-полковник Рустам Назарзода аз номи Сарвари давлат ба ҳайати кормандони техникии Кумита туҳфаҳо, ки шириниҳо, орд, шакар, биринҷ ва картошкаро дар бар мегирифт, супорид.

Ҳамчунин барои сарбозон ва афсарони ҳамаи қисмҳои ҳарбии Кумитаи мазкур дастурхони идона ороста шуда, барномаҳои консертӣ ва дигар чорабиниҳои фарҳангӣ баргузор гардиданд.

Дирӯз ҳамчунин дар ҳамаи раёсатҳои вилоятиву шаҳрӣ, аз ҷумла раёсатҳои КҲФ ва МГ дар Суғд, шаҳри Душанбе, вилояти Хатлон, ВМКБ ва шуъбаҳои ноҳиявӣ маросими супурдани туҳфаҳои солинавии Президенти Ҷумҳурии Тоҷикистон ва ҷаласаҳои тантанавии солинавӣ баргузор шуданд.

АКС: КҲФ ва МГ