Дар Душанбе оид ба арзёбии фазои соҳибкорӣ дар Тоҷикистон ва дурнамои рушди он ҳамоиш доир шуд

Декабрь 2, 2021 14:22

ДУШАНБЕ, 02.12.2021 /АМИТ «Ховар». Имрӯз дар Маркази тадқиқоти стратегии назди Президенти Ҷумҳурии Тоҷикистон дар мавзӯи «Арзёбии фазои соҳибкорӣ дар Тоҷикистон: вазъ ва дурнамои рушд» ҳамоиш баргузор гардид, ки дар кори он намояндагони вазорату идораҳо, муассисаҳои бонкӣ, соҳибкорон ва намояндагон бахши хусусӣ ширкат варзиданд.

Зимни оғози ҳамоиш Директори Маркази тадқиқоти стратегӣ Хуршед Зиёӣ мақсади ҳамоишро таҳлилу арзёбии масъалаҳои рушди фаъолияти соҳибкорӣ ва дарёфти роҳҳои ҳалли дигар масъалаҳои ҷойдошта дар ин самт арзёбӣ намуд.

Зикр шуд, ки «соҳибкорӣ ва рушди бахши хусусӣ бо дарназардошти нақши муҳим доштанашон дар ҳалли масоили иқтисодиву иҷтимоии мамлакат ва ғанӣ гардонидани имконияти буҷети давлатӣ яке аз самтҳои афзалиятноки сиёсати иқтисодии кишвар муайян гардидааст. Аз ин лиҳоз  Ҳукумати мамлакат ба рушди бахши хусусӣ, соҳибкорӣ ва беҳтар намудани фазои сармоягузорӣ дар кишварамон таваҷҷуҳи хосса зоҳир менамояд ва ташаббускори ҳалли масъалаҳои марбут ба дастгирии соҳибкорӣ мебошад. Ҳукумати Тоҷикистон рушди бахши хусусӣ, соҳибкорӣ ва сармоягузориро дар ҳуҷҷатҳои муҳими стратегии кишвар, аз ҷумла «Стратегияи миллии рушди Тоҷикистон барои давраи то соли 2030» яке аз воситаҳои асосии таъмини ҳадафҳои гузошташуда муайян намудааст»,-афзуд Х. Зиёӣ.

Тибқи сарчашмаҳои маблағгузории амалисозии онҳо ба бахши хусусӣ 54,7 млрд доллар ё 46,3 фоизи маблағҳои пешбинишуда рост меояд, ки ин далели возеҳи аҳамияти бахши хусусӣ барои таъмини рушди устувори иқтисоди миллӣ дар 9 соли оянда мебошад. Ҳоло дар назди кишвари мо доир ба истифодаи самараноки захираҳои бузурги гидроэнергетикӣ табдил додани мамлакат ба кишвари транзитӣ, таъмини амнияти озуқаворӣ, баланд бардоштани самаранокии саноати коркард ва тавсияи имконияти шуғли босамари аҳолӣ дар соҳаҳои истеҳсолӣ бар пояи рушди бахши хусусӣ ва соҳибкорӣ вазифаҳои умда қарор доранд.

«Имрӯз барои фаъолияти соҳибкорӣ, махсусан соҳибкории истеҳсолӣ қариб 110 номгӯй  имтиёзҳо пешбинӣ шуда, субъектҳои соҳибкориро зарур аст, ки имтиёзҳо ва сабукиҳои пешбининамудаи қонунгузориро самаранок истифода баранд ва низоми пардохти андозро пурра риоя намоянд. Танҳо соли 2020 ҳаҷми имтиёзу сабукиҳо ба рушди субъектҳои соҳибкорӣ пешбинигардида ба 39 млрд сомонӣ расида, нисбат ба солҳои 2016-2018 тақрибан 62 фоиз зиёд мебошад»,-изҳор медорад Х.Зиёӣ.

Инчунин дар ҳамоиш масъалаҳои арзёбии фазои соҳибкорӣ аз рӯйи соҳаҳои фаъолият, масъалаҳои дастрасӣ ба захираҳои қарзию молиявии имтиёзнок, масъалаҳои андозбандӣ ва имтиёзҳои ҷойдошта дар ин самт, монеаҳои маъмурию сунъӣ ва дигар маҳдудияти рушди фаъолияти соҳибкорӣ, дарёфти роҳҳои боз ҳам беҳтар намудани фазои соҳибкорӣ дар кишвар ва дигар мавзӯъҳо мавриди баррасӣ қарор дода шуданд.

Намояндаи Котиботи Шӯрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ Абдурауф Ҷӯраев зимни суҳбат бо мухбири АМИТ «Ховар» иброз намуд, ки дар доираи дастгирӣ ва амалинамоии тадбирҳои фазои соҳибкорӣ ва сармоягузорӣ дар Ҷумҳурии Тоҷикистон иқдомҳои муҳим, бахусус аз ҷониби Асосгузори сулҳу ваҳдати миллӣ, Пешвои миллат муҳтарам Эмомалӣ Раҳмон амалӣ мегарданд. «То имрӯз якчанд ислоҳот амалӣ гардидаанд, аз ҷумла ислоҳот дар соҳаи пайвастшавӣ ба шабакаҳои барқ, равзанаҳои ягона дар соҳаи бақайдгирии молу мулки ғайриманқул, вобаста ба пардохтҳои мусофиркашонӣ дар шаҳри Душанбе, ҳамчунин вобаста ба пардохтҳои бонкӣ ва умуман якчанд ислоҳоте гузаронида ва татбиқ шуда истодаанд, ки андешидани тадбирҳои зарурӣ дар ин самт хеле муҳим арзёбӣ карда мешавад. Ва таъсис додани Агентии инноватсия ва технологияҳои рақамии назди Президенти Тоҷикистон барои минбаъд истифода бурдани имконияти технологию электронии бештар дар ҷумҳурӣ хеле муҳим мебошад»,-мегӯяд ӯ.

Бо бо мақсади таҳкими асосҳои институтсионалии иқтисоди рақамӣ, рушди инфрасохтори иттилоотиву коммуникатсионӣ дар тамоми қаламрави кишвар, рақамикунонии соҳаҳои иқтисоди миллӣ ва вусъатбахшии раванди амалӣ намудани «ҳукумати электронӣ» Сарвари давлат муҳтарам Эмомалӣ Раҳмон зимни ироа намудани Паёми худ ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ»  (26.01.2021, шаҳри Душанбе) ба Ҳукумати мамлакат ва сохтору мақомоти дахлдор супориш дода буданд, ки доир ба таъсис додани Агентии инноватсия ва технологияҳои рақамии назди Президенти Тоҷикистон чораҷӯӣ намоянд.

Агентии мазкур бо мақсади мустаҳкамгардонии заминаҳои институтсионалии иқтисодиёти рақамӣ ва рушди инфрасохтори иттилоотӣ-коммуникатсионӣ дар саросари кишвар таъсис дода мешавад.

«Татбиқи барномаҳои қабулнамудаи мо барои гузаштан ба ин раванд қонеъкунанда нест ва зарур аст, ки тадбирҳои ба ташаккули шароит барои тақвияти соҳаи рақамикунонӣ мусоидаткунанда андешида шаванд», – зикр намуда буданд Президенти Ҷумҳурии Тоҷикистон муҳтарам Эмомалӣ Раҳмон.

Шаҳлои САДРИДДИН,
АМИТ «Ховар»,

АКСҲО: АМИТ «Ховар»

Декабрь 2, 2021 14:22

Хабарҳои дигари ин бахш

Нақши Тоҷикистон дар таҳкими амнияти ядроӣ ва радиатсионӣ баланд арзёбӣ гардид
Масъалаи таҳвили гази табиӣ аз Узбекистон ба Тоҷикистон дар давраи тирамоҳу зимистон баррасӣ карда шуд
Мутахассисони соҳаи энергетикаи Қирғизистон бо Неругоҳи барқи обии «Роғун» шинос шуданд
Тоҷикистон ва ИМА ҳамкориро дар самти тиҷораткунонии ихтироот тақвият мебахшанд
Дар Қазоқистон Намоишгоҳи маҳсулоти кишоварзӣ, саноатӣ, ҳунарҳои мардумӣ ва таомҳои миллии Хатлон оғоз мегардад
«Flaynas» ояндаи наздик дар масири Ҷидда-Душанбе-Ҷидда парвозҳои мустақими ҳавоӣ оғоз менамояд
Дар Бонки миллии Тоҷикистон имконияти платформаи рақамии амалиёти факторингӣ бо ширкати «OZPLANET» баррасӣ шуд
Дар Хоруғ корхонаи истеҳсоли макарон бунёд карда мешавад
Дар Тоҷикистон лоиҳаи «Стратегияи миллии ҳифзи гуногунии биологӣ» таҳия карда мешавад
Байни Тоҷикистон ва Беларус оид ба ҳамкории тиҷоратию иқтисодӣ даҳ санади ҳамкорӣ ба имзо расид
Татбиқи тарҳи «Тақвияти бахши молиявӣ дар Тоҷикистон» баррасӣ гардид
Байни ширкатҳои сайёҳии Тоҷикистон ва Қазони Федератсияи Русия шартномаи ҳамкорӣ ба имзо расид