Дар шаҳри Истаравшан ярмарка-фурӯши маҳсулоти кишоварзӣ доир карда шуд

ДУШАНБЕ, 28.12.2021 /АМИТ «Ховар»/. 25 декабри соли ҷорӣ бо ибтикори мақомоти иҷроияи ҳокимияти давлатии шаҳри Истаравшан бо мақсади дастрасии мардум ба маҳсулоти хушсифати озуқаворӣ ва ғанӣ намудани хони солинавии сокинони шаҳр дар маҳаллаи «Зафар» (майдони Ғалаба) ва гардиши маркази дандонпизишкии шаҳр ярмарка-фурӯши маҳсулоти кишоварзӣ баргузор гардид.

Тавре аз Хадамоти матбуотии вилояти Суғд ба АМИТ «Ховар» хабар доданд, дар ярмарка-фурӯши маҳсулот маҷмӯъан 63 тонна маҳсулоти кишоварзию саноатӣ аз он 51,12 тонна маҳсулоти кишоварзӣ ва 12 тонна маҳсулоти саноатӣ пешкаши сокинон гардонида шуда, аз ҷониби деҳқонон дар ярмарка маҳсулоти гуногуни озуқаворӣ, аз ҷумла, картошка, пиёз, сабзӣ, биринҷ, меваҳои гуногун, равған, консерва, гўшти гов, гусфанд, паранда, моҳӣ, орд, намак, шакар, тухм, асал, маҳсулоти нониву гуштӣ ва ғайраҳо бо нархҳои нисбатан арзон ба фурӯш гузошта шуд.

Ба иттилои манбаъ бо мақсади фаровонии дастурхони сокинон дар арафаи Соли нави мелодӣ ва бо нархҳои нисбатан арзон ба аҳолӣ пешниҳод намудани маводи ғизоӣ чунин ярмарка санаи 26 декабри соли ҷорӣ низ ташкил карда шуд.

АКС аз Хадамоти матбуотии Суғд