Кормандони Хадамоти шиносномавию бақайдгирӣ дар Хатлон корҳои фаҳмондадиҳӣ-иттилоотиро тақвият мебахшанд

ДУШАНБЕ, 10.11.2021. /АМИТ «Ховар»/. Кормандони масъули Хадамоти шиносномавию бақайдгирии Раёсати Вазорати корҳои дохилӣ дар вилояти Хатлон бо устодон ва донишҷӯёни Донишгоҳи давлатии Бохтар ба номи Носири Хусрав, Донишгоҳи энергетикии ноҳияи Кӯшониён, бо сокинони ҷамоати деҳоти У.Назарови ноҳияи Қубодиён, ҷамоати деҳоти Пахтаободи ноҳияи Шаҳритус вохӯриву суҳбатҳо доир намуда, дар ин зимн як зумра  шаҳрвандони хориҷӣ ва шахсони бешаҳрванд соҳиби  гувоҳномаи истиқомат гардиданд, хабар медиҳад АМИТ «Ховар» бо истинод ба Вазорати корҳои дохилии мамлакат.

Кормандони Хадамоти шиносномавию бақайдгирии Раёсати Вазорати корҳои дохилӣ дар вилояти Хатлон дар ҳамбастагӣ бо намояндагони воситаҳои ахбори омма дар байни аҳолии ҷамоатҳои шаҳраку ноҳияҳо, донишгоҳҳо, коллеҷу мактабҳои таҳсилоти миёнаи умумии вилоят  корҳои фаҳмондадиҳӣ-иттилоотӣ гузаронида, ба шаҳрвандон  доир ба иҷрои Қарори Ҳукумати Ҷумҳурии Тоҷикистон  аз 30 апрели соли 2016 «Дар бораи тартиб ва талаботи пайвастшавӣ ба шабакаҳои алоқаи барқӣ ва хизматрасониҳои вобаста ба он», бақайдгирии симкортҳо бо шиносномаҳои барориши соли 2014, Қонуни Ҷумҳурии Тоҷикистон  аз 18 декабри соли 2019 «Дар бораи авф вобаста ба қонунигардонии мақоми ҳуқуқии шаҳрвандони хориҷӣ ва шахсони бешаҳрванде, ки ба таври ғайриқонунӣ дар ҳудуди кишвар қарор доранд» маълумоти муфассал пешниҳод менамоянд.

Аз ҷониби кормандони Хадамоти шиносномавию бақайдгирии Раёсати ВКД дар вилояти Хатлон корҳои фаҳмондадиҳӣ дар ин мавзӯъ дар дигар шаҳру ноҳияҳои вилоят идома доранд.

АКСҲО: ВКД