Муштзани маъруфи тоҷик Соҳиб Усаров дар бокси ҳирфаӣ шикастнопазир боқӣ мемонад

Декабрь 21, 2021 12:03

ДУШАНБЕ, 21.12.2021 /АМИТ «Ховар»/. Варзишгарони тоҷик дар мусобиқаи бокси ҳирфаӣ «Shamo Boxing Promotions 66», ки дар маҷмааи варзишии «Криля Советов»-и шаҳри Москваи Русия доир гардид, чаҳор пирӯзӣ ба даст оварданд, хабар доданд аз Федератсияи  бокси  Тоҷикистон ба шореҳи варзиши АМИТ «Ховар».

Барои мухлисони бокс рӯйдоди муҳим дар ин мусобиқа баъди чаҳор сол ба ринг ё майдончаи бокс баргаштани муштзани маъруфи тоҷик Соҳиб Усаров мебошад, ки бо лақаби «Golden Tajik» («Тоҷики тиллоӣ») маъруф аст.

Соҳиб Усаров дар вазни 55 кило бо варзишгари узбек Бахит Абдураҳимов рақобат кард. Ӯ дар ин муборизаи тезу тунд ва ҷолиб бо тасмими якдилонаи доварон ба рақибаш дастболо шуд. Зимнан, Соҳиб Усарови 38-сола дар бокси ҳирфаӣ то ҳоло ягон қувваозмоиро набохтааст. Вай дар ҳамаи 23 рақобат, аз ҷумла дар 8-тоаш бо нокаут ғолиб гаштааст.

Соҳиб Усаров  5  декабри соли 1983 дар шаҳри Конибодоми вилояти Суғди Тоҷикистон таваллуд шуда, аз 15-солагӣ ба бокс машғул аст. Вай аз соли 1999 дар шаҳри Москваи Русия умр ба сар мебарад ва феълан мураббии бокс мебошад. Соҳиб Усаров аз соли 2006, яъне аз 22-солагӣ дар сабқати бокси ҳирфаӣ ҳунарнамоӣ мекунад.

Устоди варзиши дараҷаи байналмилалӣ Соҳиб Усаров ғолиби Ҷоми Чин (2004), чемпиони Русия (2008), чемпиони секаратаи Москва, ғолиби дукаратаи Қувваҳои Мусаллаҳи Русия, ғолиби чоркаратаи Ҷоми Масква, ғолиби дукаратаи мусобиқаи дараҷаи «А»-и бародарон Кличко мебошад.

Ёдовар мешавем, ки  мавқеи беҳтарини ӯ дар феҳристи ҷаҳонии ВOXREC мақоми 5-ум дар соли 2012 аст. Соҳиб Усаров 2  октябри соли 2009 рақибаш Александр Фёдоровро шикаст дода, ба унвони чемпиони Аврупо аз рӯи равияи Созмони ҷаҳонии бокс (WBO) даст ёфтааст.

Ин муштзани ҳирфаии тоҷик 4  феврали соли 2012 дар шаҳри Ню-Йорки Иёлоти Муттаҳидаи Амрико ба чемпиони Олимпиадаи соли 2004 ва чемпиони ҷаҳон дар соли 2001 Ян Бартелемии кубагӣ пирӯз шуда, соҳиби камарбанди WBO Inter-Continental дар вазни дувуми сабуктарин шудааст.

                                                                                       АКС аз манбаъҳои боз

Декабрь 21, 2021 12:03

Хабарҳои дигари ин бахш

Пагоҳ Вазорати маориф ва илм, Кумитаи бехатарии озуқаворӣ, Ваколатдор оид ба ҳуқуқи инсон, Маркази миллии қонунгузорӣ нишасти матбуотӣ баргузор мекунанд
Дар ҳошияи Паёми Президенти Тоҷикистон ба Маҷлиси Олӣ бо ҷавонони ноҳияи Шаҳринав вохӯрӣ доир карда шуд
Агентии беҳдошти замин ва обёрии Тоҷикистон соли 2022 ба дарозии 50,5 км корҳои соҳилмустаҳкамкунӣ гузаронидааст
ВАЗЪИ ҲАВО. 1-2 феврал дар минтақаҳои кӯҳӣ ва доманакӯҳи Тоҷикистон фаромадани тарма дар назар аст
Имрӯз Вазорати нақлиёт, Агентии авиатсияи гражданӣ, Хадамоти назорати давлатии бехатарии корҳо дар саноат ва соҳаи кӯҳкорӣ ва Саридораи геология нишасти матбуотӣ баргузор менамоянд
Дар ҳудуди шаҳри Душанбе мониторинги минтақаҳои хавфнок гузаронида шуд
МУРОҶИАТНОМАИ ШСХК «БАРҚИ ТОҶИК» БА МАРДУМИ ТОҶИКИСТОН
ВАЗЪИ ҲАВО. Имрӯз дар баъзе минтақаҳои Тоҷикистон борон меборад
Дар Ҷамоати деҳоти Куҳандиёри шаҳри Конибодом 29 техника барои мавсими нави кишт омодаи кор аст
Дар Душанбе вохӯрии гурӯҳҳои кории ҳайатҳои ҳукуматии Тоҷикистон ва Узбекистон баргузор гардид
Дар Корхонаи воҳиди давлатии «Роҳи оҳани Тоҷикистон» Паёми Президенти Ҷумҳурии Тоҷикистон тавзеҳ дода шуд
ВАЗЪИ ҲАВО. Имрӯз дар Тоҷикистон ҳаво рӯзона то 10 дараҷа гарм мешавад