Умед Бобозода ва Татяна Москалкова қазияи дар вилояти Иркутск бо шаҳрвандони Тоҷикистон рухдодаро баррасӣ намуданд

ДУШАНБЕ, 24.12.2021 /АМИТ «Ховар»/. Имрӯз, 24 декабр Ваколатдор оид ба ҳуқуқи инсон дар Ҷумҳурии Тоҷикистон Умед Бобозода бо Ваколатдор оид ба ҳуқуқи инсон дар Федератсияи Русия Татяна Николаевна Москалкова суҳбати телефонӣ анҷом дод. Дар ин бора ба АМИТ «Ховар» аз Хадамоти матубуоти Ваколатдор оид ба ҳуқуқи инсон дар Ҷумҳурии Тоҷикистон хабар доданд.

Мавзӯи меҳварии гуфтугуи телефонии ҷонибҳо аз баррасии  қазияе, ки 12 ноябри соли 2021 дар деҳаи Заларии ноҳияи Заларински вилояти Иркутски Федератсияи  Русия рух дода, дар натиҷаи он 2 нафар шаҳрвандони Ҷумҳурии Тоҷикистон кушта шуда, қисмати боқимонда ҷарроҳатҳои гуногун бардоштанд, иборат буд. Айни ҳол аз рўи маълумоти ба дастомада нисбат ба қазияи мазкур парвандаи ҷиноӣ оғоз карда шуда, корҳои тафтишӣ идома доранд.

Умед Бобозода зимни суҳбат таваҷҷуҳи Татяна Москалковаро ба зарурати таҳқиқи фоҷиаи мазкур ҷалб намуда, дархост намуд, ки таъмини ҳамаҷонибаи ҳимояи ҳуқуқи муҳоҷирони меҳнатӣ, аз ҷумла шаҳрвандони Ҷумҳурии Тоҷикистонро таҳти назоарти бевоситаи худ қарор диҳад.

Зимнан ҳангоми суҳбат роҳбарони ниҳодҳои миллии ҳифзи ҳуқуқи инсон оид ба масъалаҳои ҷудогонаи ҳифзи ҳуқуқи инсон ва шаҳрвандони кишварҳои якдигар таваҷҷуҳ зоҳир намуданд.

АКС: хадамоти матбуоти ВҲИ ҶТ