IRS: Ҳаракати воситаҳои нақлиёт дар роҳи мошингарди Душанбе-Чанок таъмин гардид

ДУШАНБЕ, 18.02.2019 /АМИТ «Ховар»/. Чанд лаҳза пеш ба шарофати меҳнати пурмаҳсули кормандони филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон роҳи мошингарди Душанбе-Чанок аз тармаҳо озод ва ҳаракати воситаҳои нақлиёт аз ду самт: Душанбе- Хуҷанд  ва Хуҷанд- Душанбе ба роҳ монда шуд.  Дар ин бора ба хабарнигори  АМИТ «Ховар» аз маркази матбуоти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон хабар доданд. 

Роҳбарони ширкат ба маълумоти ронандагон мерасонанд, ки дар ин мавсим ҳолати техникии воситаҳои нақлиёт, риояи талабот ва меъёрҳои муқарраршудаи бехатарии ҳаракат дар роҳ, аз ҷумла, бо лавозимоти ҳимоявӣ (симтобаи кашолакунӣ, занҷир, болиштаки зиддилағжиш ва ғайра) муҷаҳҳаз будан бояд пайваста дар мадди назарашон бошад.

Ёдовар мешавем, ки бо мақсади эҷод накардани монеа ба ҳаракати дигар мошинҳо ба гузариши фураҳо ва нақлиёти ядакдор маҳдудияти муваққатӣ ҷорӣ гардидааст.

Баробари расидани  иттилоъ оид ба вазъи роҳи мазкур маълумоти иловагӣ пешниҳод мегардад.

АКС: маркази матбуоти ширкати IRS