Чор рассоми навраси тоҷик дар Форуми байналмилалии аниматсия дар Тошканд иштирок мекунанд

ДУШАНБЕ, 19.04.2022 /АМИТ «Ховар»/. Аз 18 то 22 апрел дар шаҳри Тошканди Ҷумҳурии Узбекистон  Форуми байналмилалии аниматсия доир мегардад, ки аз Ҷумҳурии Тоҷикистон 4 нафар рассоми наврас аз Мактаби санъати бачагонаи ба номи Дилором Баҳромоваи шаҳри Конибодом ва ду филми аниматсионии кӯтоҳи «Садои хомӯшӣ»— и коргардони тоҷик Фарҳод Ғаффорпур ва  «Ҳувайдо»- и Лолисанам Улоғова дар он иштирок мекунанд.

Тавре директори Театри давлатии мусиқӣ-драмавии ба номи Туҳфа Фозиловаи шаҳри  Конибодом  Ғайратҷон Қодиров ба хабарнигори АМИТ «Ховар» иброз намуд, чор навраси тоҷик- Аниса Сулаймонова, Суман Раҳматова, Мурод Бошмонов  ва Ратмир Тухтабоев дар бахши кӯдакона ва ду филми аниматсионии кӯтоҳи «Садои хомӯшӣ»- и коргардони тоҷик Фарҳод Ғаффорпур ва  «Ҳувайдо»- и Лолисанам Улоғова дар бахши калонсолон иштирок менамоянд.

Бояд гуфт, ки филми аниматсионии кӯтоҳи «Садои хомӯшӣ» — и коргардон Фарҳод Ғаффорпур аввалин кори аниматсионии ӯ мебошад, ки давоми 6 моҳ сохта шудааст.

Дар Форум барои иштирокчиён ҳамоиш намоишҳои аниматсионии  ватанию хориҷӣ, вохӯриҳои эҷодӣ ва барномаҳои дигар гузаронида мешаванд.

АКС аз Ғайратҷон Қодиров