Дар доираи ташаббуси «Тозагии соҳил-2022» соҳилҳои дарёи Ғунд тоза гардиданд

ДУШАНБЕ, 17.04.2022 /АМИТ «Ховар»/. Дар доираи ташаббуси «Тозагии соҳил-2022»,  ки бо иқдоми Сарраёсати ҳифзи муҳити зисти Вилояти Мухтори Кӯҳистони Бадахшон гузаронида шуд, 1,2 км соҳили дарёи Ғунд аз партов тоза гардид, хабар медиҳад АМИТ «Ховар» бо истинод ба Кумитаи ҳифзи муҳити зисти назди Ҳукумати ҷумҳурӣ.

Дар ин ташаббус 70 нафар кормандони Сарраёсат ва шуъбаи ҳифзи муҳити зисти шаҳри Хоруғ, хоҷагии ҷангал, Зоркӯл ва Парки миллӣ иштирок намуда, беш аз 1,5 метри мураббаъ партовҳои аз соҳили дарё ҷамъоваришударо ба партовгоҳи асосӣ интиқол доданд.

Ташаббуси «Тозагии соҳил-2022» бо мақсади тозаю озода нигоҳ доштани соҳилҳои дарёҳо ва каналу ҷӯйборҳо  моҳи март дар Бадахшон оғоз гардида, дар рӯзҳои мусоид  вобаста ба вазъи обу ҳаво дар қаламрави вилоят  идома меёбад.

 АКС: Кумитаи ҳифзи муҳити зисти назди Ҳукумати ҶТ