Дар Ҳисор бо иштироки муовини Сарвазири Тоҷикистон ва пирони кор кишти чигит оғоз ёфт
ДУШАНБЕ, 04.04.2022 /АМИТ «Ховар»/. Бо истифода аз боду ҳавои мусоиди моҳи апрел дар хоҷагиҳои деҳқонии «Мурутак» ва «Холмаҳмад Қараев»-и шаҳри Ҳисор кишти чигит оғоз гардида, дар ин маъракаи кишоварзӣ муовини Сарвазири Ҷумҳурии Тоҷикистон Матлубахон Сатториён ва иҷрокунандаи вазифаи раиси шаҳри Ҳисор Қосим Роҳбар, пирони кор ва деҳқонону хоҷагидорон иштирок намуда, ба деҳқонон барои рӯёнидани ҳосили дилхоҳи «тиллои сафед» барору комёбӣ таманно намуданд.
Дар ин бора АМИТ «Ховар» бо истинод ба Мақомоти иҷроияи ҳокимияти давлатии шаҳри Ҳисор хабар медиҳад.
Дар деҳаҳои Чанори Ҷамоати деҳоти «Ориён» ва Гулхании Ҷамоати деҳоти «Ҳисор» муовини Сарвазир Матлубахон Сатториён бо фаъолони ҷамоатҳо мулоқот намуда, мақсади сафарашро шиносоӣ бо омодагии соҳаҳои иқтисодиёт ва иҷтимоиёти ҷумҳурӣ ба мавсими тирамоҳу зимистони солҳои 2022-2023 маънидод намуд.
Раисони ҷамоатҳои деҳот оид ба ҷараёни корҳои баҳорӣ, сохтмону ободонӣ ва омода намудани нақшаи чорабиниҳои ҷашнӣ ба муносибати 35-солагии Истиқлоли давлати маълумот дода, муовини Сарвазири мамлакатро бовар кунониданд, ки ба ҷашни мубораки истиқлол омодагии ҳамаҷониба гирифта, бо дастовардҳои арзандаи меҳнатӣ ин санаи таърихиро истиқбол мегиранд.
Муовини Сарвазири мамлакат дар мулоқот бо фаъолони ҷамоатҳо вобаста ба ташаннуҷи авзои сиёсии ҷаҳон ва минтақа, баланд гардидани нарху наво дар ҷаҳон ва кишвар сухан гуфта, онҳоро аз пайомадҳои эҳтимолии он огоҳ намуд. Барои коҳиш додани таъсири манфии буҳрони ҷаҳонӣ ба зиндагии мардум Матлубахон Сатториён истифодаи самараноки ҳар ваҷаб қитъаи замин, риояи талаботи Қонуни Ҷумҳурии Тоҷикистон «Дар бораи танзими анъана ва ҷашну маросим», зиёдаравӣ накардан, инчунин муттаҳидию аҳлона меҳнат карданро таъкид карда, тавсия ва маслиҳатҳои судманд дод.
Дар мулоқот масъалаҳои марбут ба даъвати ҷавонон ба хизмати ҳарбӣ, эмгузаронӣ ба муқобили бемории COVID-19, нақшаи чорабиниҳои ҷашнӣ бо зиёд кардани миқдори иншооти зарурии иҷтимоӣ дар деҳот, вусъати корҳои ободонию созандагӣ ва сари вақт ба анҷом расонидани кишту кори баҳорӣ баррасӣ гардида, ба масъулин дастуру супоришҳо дода шуд.
Муовини Сарвазир ва иҷрокунандаи вазифаи раиси шаҳр дар деҳаи Мурутак вориди ҳавлии сокинони деҳа Холмурод Назаров ва Баҳриддин Давлатов шуда, бо корҳои деҳқонӣ ва ҳолати истифодаи замини наздиҳавлигӣ дар деҳот шинос шуданд.
АКСҲО: Мақомоти иҷроияи ҳокимияти давлатии шаҳри Ҳисор.
Эмомалӣ Раҳмон: «Тоҷикистон тасмим гирифтааст, ки то соли 2040 рақамикунонии мудирияти захираҳои обро то 80 фоиз афзоиш диҳад»
РАВАНДИ ОБИ ДУШАНБЕ. Дар намоишгоҳи байналмилалӣ иқтидори обию энергетикӣ ва шаҳсозии Тоҷикистон муаррифӣ гардид
РАВАНДИ ОБИ ДУШАНБЕ. Дар Душанбе таҳти унвони «Об — манбаи ҳаёти инсоният» Фестивали об ва барномаи фарҳангӣ доир шуд
Имконоти иқтисодии Тоҷикистон бо ҳайати намояндагони ширкатҳои байналмилалии молиявӣ баррасӣ шуд
РАВАНДИ ОБИ ДУШАНБЕ. Форуми ҳамоҳангсозии Осиёи Марказӣ оид ба мониторинг, арзёбӣ ва моделсозии пешгӯии пиряхҳо ва криосфера баргузор гардид
РАВАНДИ ОБИ ДУШАНБЕ. Устувории низомҳои озуқаворӣ дар давраи камбуди ҷаҳонии об дар Душанбе баррасӣ гардид
Форуми байналмилалии «Об ва зеҳни сунъӣ – робитаи дуҷониба» баргузор гардид
Равиши ҳамгироёнаи идоракунии захираҳои об дар меҳвари Форуми 7-уми байналмилалӣ дар Душанбе қарор гирифт
РАВАНДИ ОБИ ДУШАНБЕ. Машварати минтақавии Осиё ва Уқёнуси Ором оид ба Конфронси оби СММ баргузор гардид
Султон Раҳимзода: «Тоҷикистон имконияти бузурги таъмини кишварҳои Осиёи Марказӣ ва ҳатто Осиёи Ҷанубиро бо барқи «сабз» дорад»
РАВАНДИ ОБИ ДУШАНБЕ. Форуми «Об ва хатарҳои иқлимӣ: илм, мониторинг ва идоракунӣ» баргузор шуд
Дар ноҳияи Бобоҷон Ғафуров ҷамъоварии маҳсулоти барвақтӣ идома дорад
