Доир ба «Стратегияи миллии рушди Ҷумҳурии Тоҷикистон барои давраи то соли 2030» машварати илмӣ-назариявӣ доир шуд

ДУШАНБЕ, 08.04.2022 /АМИТ «Ховар»/. Имрӯз таҳти раёсати раиси кумитаи Маҷлиси намояндагони Маҷлиси Олии Ҷумҳурии Тоҷикистон оид ба сохтори давлатӣ ва худидоракунии маҳаллӣ Файзалӣ Идизода, намояндагони Вазорати рушди иқтисод ва савдои Ҷумҳурии Тоҷикистон дар мавзӯи «Стратегияи миллии рушди Ҷумҳурии Тоҷикистон барои давраи то соли 2030»  машварати илмӣ-назариявӣ баргузор гардид, хабар дод котиби матбуоти Маҷлиси намояндагон Муҳаммадато Султонов ба АМИТ «Ховар».

Вазорати рушди иқтисод ва савдо фаъолияти худро тибқи муқаррароти моддаҳои 8 ва 20 Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ», яъне дар самти барномаҳои рушди иҷтимоию  иқтисодии вилоятҳо ва шаҳру ноҳияҳо ба роҳ мондааст, иброз намуд сардори Раёсати рушди минтақаҳо ва мониторинги иҷрои барномаҳои  Вазорати рушди иқтисод ва савдои Ҷумҳурии Тоҷикистон  Фаррух Файзуллозода.

Мавсуф  ҳамчунин изҳор намуд, ки  вазорат тибқи қарори Ҳукумати Ҷумҳурии Тоҷикистон аз 29 декабри соли 2018,  «Дар бораи Қоидаҳои гузаронидани мониторинг ва арзёбиии амалишавии ҳуҷҷатҳои стратегии сатҳи миллӣ, барномаҳои соҳавӣ ва минтақавии рушд дар Ҷумҳурии Тоҷикистон» мақоми ваколатдор буда, барномаҳоро бо дарназардошти ҳадафу афзалияти ҳуҷҷатҳои стратегии кишвар, аз ҷумла Стратегияи миллии рушд барои давраи то соли 2030, Барномаи миёнамуҳлати рушд барои солҳои 2021-2025 ва Ҳадафҳои рушди устувор дар ҳамкорӣ бо мақомоти иҷроияи ҳокимияти давлатии маҳаллӣ мавриди мониторинг ва арзёбӣ қарор медиҳад.

Бо мақсади мутобиқ намудани барномаҳои нави рушд ба ин Тартиб ва ҳамоҳанг сохтани онҳо ба ҳадафу афзалияти муайяннамудаи Ҳукумати мамлакат гурӯҳҳои кории байниидоравӣ ҷиҳати расонидани кумаки методӣ дар таҳияи барномаҳои нави рушд ба мақомоти иҷроияи ҳокимияти давлатии шаҳру ноҳияҳои ҷумҳурӣ ба шаҳру ноҳияҳо сафар намуда, ба мутахассисони мақомоти маҳаллии ҳокимияти давлатӣ доир ба таҳияи барномаҳои рушди маҳал кумаки методию машваратӣ мерасонанд.

Мақсади асосии барномаҳои қабулгардида- таъмин намудани рушди устувори соҳаҳои воқеии иқтисодиёт дар асоси коркарди маҳсулоти саноатӣ, истифодаи ашёи хоми маҳаллӣ, беҳтар намудани хизматрасониҳои иҷтимоӣ ва бо ин роҳ боло бурдани сатҳу сифати зиндагии аҳолӣ мебошад.

Ҳадафу афзалияти муайяннамудаи Ҳукумати мамлакат дар ҳуҷҷатҳои стратегии сатҳи миллӣ, аз ҷумла Стратегияи миллии рушди Ҷумҳурии Тоҷикистон барои давраи то соли 2030 ва Барномаи миёнамуҳлати рушди Ҷумҳурии Тоҷикистон барои солҳои 2021-2025 дар маҳал тавассути барномаҳои минтақавӣ амалӣ карда мешавад.

Дар ҳамоиш зикр шуд, ки айни замон дар кишвар 65 барномаи рушди иҷтимоию иқтисодии вилоятҳо ва шаҳру ноҳияҳо таҳия гардида, мавриди амал қарор гирифтаанд.

АКС: АМИТ «Ховар»