Гурӯҳи корӣ ба сокинони минтақаи Долони ноҳияи Шаҳринав моҳияти дастури Пешвои миллатро оид ба захираи маҳсулот расонид

ДУШАНБЕ, 11.04.2022 /АМИТ «Ховар»/. 9 апрел намояндаи Ҳукумати Ҷумҳурии Тоҷикистон, директори Корхонаи воҳиди давлатии «Тоҷикагролизинг» Юсуф Акрамзода ба минтақаи Долон –деҳаҳои Долон -1, Долон -2 ва Долон -3 -и Ҷамоати деҳоти ба номи Акрам Ҳасанови ноҳияи Шаҳринав ҷиҳати расонидани дастуру супоришҳои Пешвои миллат, ки дар маҷлиси Ҳукумати Ҷумҳурии Тоҷикистон 30 марти соли 2022 баён гардида буданд, сафари корӣ анҷом дод.

Тавре ба АМИТ «Ховар» дар мақомоти иҷроияи ҳокимияти давлатии ноҳияи Шаҳринав хабар доданд, намояндаи Ҳукумати Ҷумҳурии Тоҷикистон Юсуф Акрамзода  ва  раиси ноҳияи Шаҳринав Ҷаббор Носирзода дар  деҳаи Долони-1  нахуст аз вазъи Муассисаи таҳсилоти миёнаи умумии №29 дидан намуданд. Зимни мулоқот  иттилоъ дода шуд, ки дар муассисаи мазкур 190 нафар  хонанда дар як баст ба омӯзиш фаро гирифта шуда, бо  омӯзгорони тахассусӣ пурра таъмин мебошанд.

Сокинони деҳаҳои мазкур иброз доштанд, ки баҳри иҷрои дастуру супоришҳои Сарвари давлат онҳо дар заминҳои лалмии минтақаи долон кишти тирамоҳии ғалладонагиҳоро дар моҳҳои октябр ва ноябр иҷро карда, дар ин росто кишти барвақтии картошкаро  низ дар заминҳои наздиҳавлигӣ гузарониданд.

Бояд гуфт, ки сокинони меҳнатқарини Долон баҳри иҷрои дастуру супоришҳои Сарвари давлат дар ин ҷода аз тамоми имконот самаранок истифода мебаранд. Гурӯҳи корӣ аз деҳаҳои Долон -1, 2 дидан намуда, моҳияти дастури Пешвои миллатро ба аҳолӣ расониданд.

Дар идомаи сафари корӣ намояндаи Ҳукумати Ҷумҳурии Тоҷикистон ба Ҷамоати деҳоти Шаҳринав рафта, дар бинои маҷлисгоҳи шуъбаи маориф бо роҳбарони корхонаву ташкилоти ҳудуди ноҳия ва фаъолони ҷамоат мулоқоти судманд анҷом дод.

Юсуф Акрамзода дар бораи муҳтавои Паёми Президенти Ҷумҳурии Тоҷикистон муҳтарам Эмомалӣ Раҳмон дар бораи самтҳои асосии сиёсати дохилӣ ва ҳориҷии ҷумҳурӣ, захираи маҳсулот барои ду соли оянда ва гирифтани 3-4 ҳосил аз замин дар як сол, сафарбарии ҷавонон ба хизмати ҳарбӣ, истифодаи сарфакоронаи неруи барқ ва риоя намудани қоидаҳои зидди сӯхтор, худдорӣ кардан аз истифодаи дастгоҳу таҷҳизоти серхароҷот, вусъат бахшидан ба корҳои ободонию созандагӣ ва аҳамият додан ба сатҳу сифати иншооти бунёдшаванда бахшида ба ҷашни 35–солагии Истиқлоли давлатии Ҷумҳурии Тоҷикистон, инчунин дар бораи истифодаи самараноку оқилонаи ҳар ваҷаб замин, махсусан заминҳои наздиҳавлигӣ ва хоҷагиҳои ёрирасон, кишти зироат, аз қабили картошка, сабзавот, ғалладонагиҳо ва дигар маҳсулоти кишоварзӣ ва омодагӣ дидан ба кишти такрорӣ баҳри баланд бардоштани ҳосилнокии зироат сухан гуфт.

Дар фарҷоми мулоқот раиси ноҳияи Шаҳринав Ҷаббор Носирзода ба намояндаи Ҳукумати Ҷумҳурии Тоҷикистон изҳор намуд, ки мардуми ноҳияи Шаҳринав чун тамоми мамлакат аз ғамхориҳои беназири Сарвари давлат сипосгузор буда, сиёсати хирадмандонаю созанда ва бунёдкоронаи давлат ва Ҳукумати Ҷумҳурии Тоҷикистонро пурра дастгирӣ менамоянд ва барои амалӣ гардонидани онҳо тамоми қувв ва ақлу заковати хешро равона менамоянд.

АКСҲО: мақомоти иҷроияи ҳокимияти давлатии ноҳияи Шаҳринав