«Хизматрасониҳои маҷмӯӣ барои модар ва кӯдак» лоиҳаи беҳтарини Бонки осиёии рушд дар соли 2021 пазируфта шуд

ДУШАНБЕ, 13.04.2022 /АМИТ «Ховар»/. Лоиҳаи «Хизматрасониҳои маҷмӯӣ барои модар ва кӯдак» (Гранти Бонки осиёии рушд-0627-TAJ(SF))-и назди Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Лоиҳаи беҳтарини Бонки осиёии рушд дар соли 2021 пазируфта шуд, иттилоъ доданд ба АМИТ «Ховар» дар маркази матботи вазорати мазкур.

12 апрел директори Лоиҳаи «Хизматрасониҳои маҷмӯӣ барои модар ва кӯдак» (Гранти Бонки осиёии рушд-0627-TAJ(SF))-и назди Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Серфитикати лоиҳаи мазкурро ба Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода тақдим намуд.

Зикр шуд, ки лоиҳаи  мазкур  дар ноҳияҳои таҷрибавии Рашт ва Файзободи тобеи ҷумҳурӣ ва Шамсиддин Шоҳини вилояти Хатлон амалӣ шуда истода, ҳадафи асосии он  беҳтар намудани сатҳу сифати хизматрасонии тиббӣ ба модарону кӯдакон дар ноҳияҳои зикршуда  мебошад.

Ёдовар мешавем, ки татбиқи лоиҳаи мавриди назар  аз 29 марти соли 2019 оғоз гардида, то 31 августи соли 2025 ба нақша гирифта шудааст. Лоиҳа аз чаҳор қисмати амалисозӣ иборат аст. Аз ҷумла, беҳтар намудани хизматрасонии маҷмӯии босифат оид ба ҳифзи саломатии модар ва кӯдак дар ноҳияҳои таҷрибавӣ, такмил додани хизматрасониҳо дар бахши саломатии модару кӯдак ва беҳтаркунии инфрасохторҳо, баланд бардоштани сатҳи дониш дар соҳаи саломатии модару кӯдак ва рафтори ба нигоҳдории саломатӣ нигаронидашуда дар ноҳияҳои таҷрибавии лоиҳа, идоракунии лоиҳа ва баҳодиҳӣ.

АКС: Вазорати тандурустӣ ва ҳифзи иҷтимоии аҳолии ҶТ