Мария Захарова: «30 соли равобити дипломатӣ миёни Русия ва Тоҷикистон ба минтақаи Осиёи Марказӣ таъсири судманд гузошт»

ДУШАНБЕ, 07.04.2022 /АМИТ «Ховар»/. Сӣ соли сипаригардида аз барқарории равобити дипломатӣ миёни Москва ва Душанбе, ки 8 апрел таҷлил мешавад, ба минтақаи Осиёи Марказӣ таъсири судманд гузошт. Корҳои муштарак дар ин давра имкон доданд, ки масъалаҳои муҳимтарини рушди иҷтимоию иқтисодӣ ва иртибототи фарҳангиву гуманитарӣ дар ҳамоҳангӣ ҳал карда шаванд. Тавре АМИТ «Ховар» бо истинод ба ТАСС хабар медиҳад, дар ин бора дар Москва зимни  нишасти хабарӣ намояндаи расмии Вазорати корҳои хориҷии Русия Мария Захарова изҳори назар намуд.

«8 апрел ба барқарор шудани муносибатҳои дипломатӣ миёни кишвари мо ва Ҷумҳурии Тоҷикистон 30 сол пур мешавад. Тайи се даҳсола фаъолияти пурсамари ду кишвар имкон дод, ки масъалаҳои муҳими рушди иҷтимоию иқтисодӣ, иртибототи фарҳангиву гуманитарӣ, таҳкими иқтидори мудофиавӣ, амнияти Русия ва Тоҷикистон ҳамоҳанг карда шаванд, ки ин ба рушди муносиботи дуҷониба ва вазъияти тамоми минтақаи Осиёи Марказӣ таъсири судманд расонид», — гуфт дипломат.

Вай зикр кард, ки ҷонибҳо «муколамаи ғании сиёсӣ» доранд. «Мулоқотҳои сарони давлатҳои мо ҳам дар шакли дуҷониба ва ҳам дар барномаҳои бисёрҷониба, пеш аз ҳама, дар СААД, ИДМ ва СҲШ мунтазам баргузор мешаванд. Машваратҳо тавассути роҳбарони вазоратҳои корҳои хориҷӣ, парлумонҳо, роҳбарони қариб ҳамаи вазорату идораҳо гузаронида мешаванд, — идома дод ӯ. — Кишварҳои мо ҳама гуна табъизро, ки ба нажод, забон ва дин вобастаанд, қатъиян маҳкум мекунанд. Онҳо ба кӯшишҳои сохтакории таърих ва аз нав навиштани натиҷаҳои Ҷанги дуюми ҷаҳон қатъиян муқобиланд».

Дипломат иброз дошт, ки ҳарду кишвар дастовардҳои шарикии стратегӣ ва иттифоқиро, ки бар пояи муштараки манфиатҳо ва арзишҳои дӯстии қадимии ду кишвар асос ёфтаанд, қадр мекунанд.

АКСҲО: Вазорати корҳои хориҷии Русия/АМИТ «Ховар»