ПАНҶСОЛАИ РУШДИ САНОАТ. ҶДММ «Тоҷфилиз» дар се моҳ ба маблағи зиёда аз 2 миллион сомонӣ маҳсулот истеҳсол намуд

ДУШАНБЕ, 27.04.2022 /АМИТ «Ховар»/. Корхонаи истеҳсоли мехҳои печони ҶДММ «Тоҷфилиз» дар се моҳи соли равон ба миқдори 163,4 тонна мех ба маблағи зиёда аз 2 миллион сомонӣ истеҳсол намудааст. Дар ин бора  26 апрел зимни шиносоӣ бо раванди истеҳсоли маҳсулоти саноатӣ дар корхонаи истеҳсоли мехҳои печони ҶДММ «Тоҷфилиз» ба и.в. раиси шаҳри Бӯстон Мавсума Муинӣ иттилоъ дода шуд, хабар медиҳад АМИТ «Ховар» бо истинод ба мақомоти иҷроияи ҳокимияти давлатии шаҳри  Бӯстон.

Зикр гардид, ки корхонаи мазкур соли 2019 аз ҷониби Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мавриди баҳрабардорӣ қарор гирифта, ба истеҳсол ва содироти маҳсулоти саноатӣ машғул мебошад.

Дар корхонаи саноатӣ зиёда аз 25 намуди мехҳои печони шаклҳои гуногун истеҳсол мегарданд.

Дар айни замон шумораи кормандон дар корхонаи мазкур  зиёда аз 90 нафарро ташкил медиҳад. Бештари онҳо занон буда, бо маоши хуб ва хӯроки гарм таъмин карда шудаанд.

 АКС: МИҲД-и шаҳри Бӯстон