Сокинони ноҳияи Шаҳринав бо гирифтани 2-3 ҳосил дар ғанӣ гардонидани бозори истеъмолии Тоҷикистон саҳм мегузоранд

ШАҲРИНАВ, 06.04.2022 /АМИТ «Ховар»/. Бо мақсади иҷрои дастуру супоришҳои Пешвои миллат муҳтарам Эмомалӣ Раҳмон  намояндаи Ҳукумати Ҷумҳурии Тоҷикистон, директори КВД «Тоҷикагролизинг» Юсуф Акрамзода ва раиси ноҳияи Шаҳринав Ҷаббор Носирзода давоми 10 рӯз дар ҷамоатҳои шаҳраку деҳоти ноҳия ҷиҳати бурдани корҳои фаҳмондадиҳӣ бо мардум суҳбату мулоқот доир намуда, баҳри вусъат бахшидан ба корҳои саҳроӣ, бахусус кишти зироати барвақтӣ, корҳои ободонӣ, бунёдкорӣ, истифодаи самаранокии ҳар ваҷаб заминҳои кишт, махусусан заминҳои наздиҳавлигӣ ва хоҷагиҳои ёрирасон бо сокинон корбарӣ менамоянд, хабар медиҳад мухбири минтақавии АМИТ «Ховар».

Юсуф Акрамзода дар ҷамоати шаҳраки ба номи М. Турсунзода бо фаъолият ва иқтидори кории ҶДММ «Орди Шаҳринав» шинос шуда, масъулони корхонаро баҳри рушд ва тақвияти иқтидори кории корхона вазифадор намуд. Иттилоъ дода шуд, ки иқтидори истеҳсолии корхонаи мазкур дар як шабонарӯз 100 тонна ордро ташкил дода, имкон дорад, ки талаботи аҳолии ноҳияро бо ин маҳсулоти мавриди ниёзи аввал пурра қонеъ гардонад.

Мавриди зикр аст, ки нархи фурӯши  50 кг орд дар ин корхона аз 260 то 290 сомонӣ буда, нисбат ба бозор хеле арзон мебошад. Ҳамзамон намояндагон ба хонаҳои истиқоматии сокинони ҷамоат рафта, аз заминҳои наздиҳавлигии шаҳрвандон дидан намуда, бо тарзи самаранок истифода бурдани заминҳои наздиҳавлигӣ шинос шуданд.

Юсуф Акрамзода ва раиси ноҳияи Шаҳринав Ҷаббор Носирзода дар деҳаи Деҳқонободи  Ҷамоати деҳоти Сабоа аз заминҳои наздиҳавлигӣ, ёрирасон (президентӣ) ва хоҷагиҳои деҳқонии деҳаи мазкур дидан карда, бо деҳқонон суҳбат доир намуда, барои истифодаи дурусту самараноки заминҳои корами кишоварзӣ  миннатдорӣ изҳор намуданд.

Сокинони ноҳия бо боварӣ иброз доштанд, ки иҷрои дастуру супоришҳои Сарвари давлатро сармашқи кору пайкори зиндагии худ қарор дода, дар кори самаранок истифода намудану гирифтани 2-3 ҳосил аз заминҳои наздиҳавлигӣ, ёрирасон ва хоҷагиҳои деҳқонӣ барои эҳтиёҷи оилаҳои худ ва ғанӣ гардонидани бозори истеъмолӣ саҳм мегузоранд.

Ёдовар мешавем, ки бо Амри Президенти Ҷумҳурии Тоҷикистон муҳтарам Эмомалӣ Раҳмон  аз 30 марти соли 2022  бо мақсади иҷрои дастуру супоришҳои Асосгузори сулҳу ваҳдати миллӣ -Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки  дар маҷлиси Ҳукумати Ҷумҳурии Тоҷикистон дода буданд, намояндагони Ҳукумати Ҷумҳурии Тоҷикистон ва Дастгоҳи иҷроияи Президенти Ҷумҳурии Тоҷикистон аз 2 то 10 апрели соли равон ба  вилоятҳо ва шаҳру ноҳияҳо сафарбар гардидаанд.

АКСҲО: Мақомоти иҷроияи ҳокимияти давлатии ноҳияи Шаҳринав