Тоҷикистон ҳамкориро бо якчанд давлат дар соҳаҳои энергетика ва сармоягузорӣ густариш медиҳад

ДУШАНБЕ, 20.04.2022 /АМИТ «Ховар»/. Вазири саноат ва технологияҳои нави Ҷумҳурии Тоҷикистон Шералӣ Кабир бо директори генералии ширкати Engineering Dimension International Investment lc Шоҳигарии Арабистони Саудӣ Муҳаммад Ҳиҷӣ мулоқоти  маҷозӣ анҷом дод. Дар ин бора маркази матбуоти вазорат хабар додааст.

Дар вохӯрӣ инчунин Сафири Ҷумҳурии Тоҷикистон дар Шоҳигарии Арабистони Саудӣ Акрам Каримӣ, шарикон ва намояндагони ширкати зикршуда аз Амрико, Чин, Австралия ва Олмон иштирок доштанд.

Дар мулоқот масъалаҳои тавсеаи ҳамкорӣ дар бахшҳои истеҳсоли трансформаторҳои бузурги барқӣ, зеристгоҳҳо ва хатҳои барқӣ, бунёди неругоҳҳои нави бузурги барқӣ, лоиҳаҳои сармоягузорӣ барои сохтмони хатҳои баландшиддати барқ, нафту кимиё, саноати коркард  ва кластерҳои бофандагӣ баррасӣ гардиданд.

Бо мақсади татбиқи лоиҳаҳои ояндадор тасмим гирифта шуд, ки дар ҳамкории муштарак  харитаи роҳ ва гурӯҳи корӣ таъсис дода шавад.

АКС: Вазорати саноат ва технологияҳои нави Ҷумҳурии Тоҷикистон