Дар вилояти Суғд 20 коргоҳи истеҳсоли обҳои ташнагишикан фаъолият доранд

ДУШАНБЕ, 25.05.2022 /АМИТ «Ховар»/. Дар вилояти Суғд баробари содироти маъдан ва консентрат, семент, чарм, либосворӣ, маҳсулоти кишоварзиву консервагӣ содироти обҳои ташнагишикан низ ба роҳ монда шуда, ба иттилои  Раёсати минтақавии гумрук, аз вилояти Суғд давоми чор моҳи соли равон обҳои газноки бе истифодаи шакар 64 тонна ба маблағи 11 849 ҳазор доллар, обҳои газнокшуда бо таъми ширин 3752 тонна ба маблағи 1160424 ҳазор доллар, шарбатҳои мевагӣ ва сабзавотӣ 93 тонна ба маблағи 44593 ҳазор доллар ба Ҷумҳурии Қазоқистон содирот шудааст, хабар доданд ба АМИТ «Ховар» дар  Хадамоти матбуоти Раиси вилоят.

Бино ба иттилои шуъбаи саноат ва энергетикаи мақомоти иҷроияи ҳокимияти давлатии вилоят, ҳоло дар қаламрави вилоят қариб 20 коргоҳи истеҳсоли обҳои ташнагишикан, аз ҷумла ҶСП «Оби Зулол», ҶСП «Евро – Азия – 2005», ҶДММ «Сирдарё», ҶДММ «Нӯшокиҳои муҳаббат», ҶДММ «Оби Ватан», ҶДММ «Оби Ширин», ҶДММ «Шаҳд», ҶДММ «Шарбати мева» ва амсоли ин фаъолият доранд. Коргоҳҳои мазкур бештар дар шаҳрҳои Хуҷанд, Гулистон ва Истаравшан мавҷуданд.

Истаравшан яке аз шаҳрҳои саноатӣ маҳсуб шуда, дар он беш аз 50 корхонаи хурду миёна, аз ҷумла ҶДММ «Адл», ҶДММ «Автошина», корхонаи истеҳсолии «Авангард-2013», ҶДММ «Покиза-2013», ҶДММ «Кафшгар», ҶДММ «Нурпак», ҶДММ «Наврӯзи ҷаҳон», ҶСП «Оби Зулол» ва дигар коргоҳҳои саноатӣ фаъолият доранд. Алҳол дар корхонаҳои саноатии шаҳр 1285 нафар бо ҷойи кори доимӣ таъминанд.

Мутахассиси пешбари шуъбаи рушди иқтисод ва савдои мақомоти иҷроияи ҳокимияти давлатии шаҳр Алишер Маъмуров иттилоъ дод, ки дар чор моҳи соли равон ҳаҷми истеҳсоли маҳсулоти саноатӣ ба 208 миллиону 904,6 ҳазор сомонӣ расида, нисбат ба ҳамин давраи соли гузашта 124,6 фисад афзудааст.

Баробари эълон гардидани Солҳои рушди саноат (2022 – 2026) чор корхонаи хурду миёнаи саноатӣ, аз ҷумла ҶДММ «Файзи тиҷорат» барои истеҳсоли маснуоти нассоҷӣ – ватин ва синтофон, ҶДММ «Нури Истаравшан» барои истеҳсоли маҳсулоти ҷӯроб, ҶДММ «Санги Сабур» барои истеҳсол ва коркарди сангу шағал ва ҶДММ «Шарафи рўз» барои  истеҳсоли бомпӯши пластмасӣ ба фаъолият оғоз карданд.

«Дар ин коргоҳҳо беш аз 30 нафар сокини шаҳр бо ҷойи кори доимӣ таъмин гардиданд, — афзуд Алишер Маъмуров. Дар шаҳр маҳсулоти ду коргоҳи саноатӣ, аз ҷумла ҶСП «Оби Зулол» — истеҳсоли обҳои ташнагишикан ва ҶДММ «Адл» — истеҳсоли бозичаҳои бачагона ба содирот равона шудааст. Яке аз коргоҳҳои бузурги шаҳр- Ҷамъияти саҳомии пӯшидаи «Оби Зулол» чанд сол инҷониб содироти обҳои ташнагишикан, аз ҷумла истеҳсоли нӯшокиҳои ташнагишикан, коркарди меваю сабзавот, мураббо ва афшураҳои мевагӣ, истеҳсоли ғизои кӯдакон дар борҷомаҳои мулоимро ба роҳ мондааст».

Ҳамчунин дар коргоҳ истеҳсоли нӯшокиҳои ташнагишикан ва афшураҳо бо тарзи резиши гарм ва хунук дар зарфҳои шишагин, ки ҳаҷмашон 0,33 ва 0,5 — литра аст, ташкил шудааст. Маҳсулоти истеҳсолшавандаи ширкат пурра аз меваҳои ватанӣ буда, асосан ба Федератсияи Русия, Ҷумҳурии Қазоқистон ва дигар давлатҳо содирот мешаванд. Содирот бештар дар самти нӯшокиҳои ташнагишикан, обҳои нӯшокӣ, шаҳду шарбатҳои мевагӣ ба роҳ монда шудааст. Давоми чор моҳи соли равон маҳсулоти истеҳсолшудаи коргоҳ ба маблағи 13 миллиону 998,8 ҳазор сомонӣ ба давлати Қазоқистон содирот шудааст. Яке аз обҳои ташнагишикане, ки дар бозор харидорони худро дорад, ин нӯшокии RC Cola аст. Дар таркиби нўшокии мазкур маводи кимиёвӣ дида намешавад.

Директори истеҳсолот Ғанӣ Қурбонов зимни суҳбат гуфт, ки «барои дар бозори ҷаҳонӣ мавқеи худро ишғол кардан роҳбарият мекӯшад ба харидорон танҳо маҳсулоти босифат пешниҳод созад. Ҳоло ширкат қариб 100 номгӯй маҳсулот истеҳсол мекунад. Нӯшокии RC Cola дар чор шакл, аз ҷумла дар ҳаҷми 0,33 — 0,5 – 1 – 1,5 литр дар зарфҳои пластикӣистеҳсол мешавад. Нўшокии мазкур бо 4 намуд таъму мазза — RC Cola, Green apple, Orang, Lemon laim омода мешавад. Дар як шабонарӯз танҳо як намуд, масалан, нӯшокӣ дар зарфи 1,5 — литра 500 ҳазор литр, дар зарфи 0,5 — литра 180 ҳазор литр истеҳсол мешавад».

Мавриди зикр аст, ки чанде қабл дар ширкати мазкур хатти нави технологӣ ба фаъолият шурӯъ карда буд. Дар хатти нав имкони дар зарфҳои шишагин истеҳсол кардани RC Cola ва шарбати мева имконпазир аст. Ҳоло ширкат содироти нўшокии мазкурро дар зарфи шишагин ба роҳ мондааст. Ашёи хоми нўшокии RC Cola ба ҷуз об аз Аврупо ва Ҷумҳуриҳои Узбекистону Қирғизистон ворид карда мешавад.  Ин ширкат дар Ҷамоати деҳоти Нофароҷ ҳанӯз 12  сентябри соли 2000  ба истифода дода шуда буд. То ин дам дар корхонаи саноатӣ чор хати технологӣ мавҷуд буда, боз ду хати нави истеҳсолӣ ба кор даромадааст.

Масоҳати умумии ҶСП «Оби зулол» 10 гектар буда, аз он 3 гектар масоҳати истеҳсолиро ташкил медиҳад. Хатти якум ба маблағи 18 миллиону 930 ҳазор сомонӣ ва хатти дуюм ба маблағи 6 миллиону 960 ҳазор сомонӣ сохта, ба истифода дода шудааст. Хатҳои технологӣ ба стандарти ҷаҳонӣ ҷавобгӯ буда, аз давлати Италия ворид шудаанд ва мутахассисон низ дар ин давлат таҷрибаомӯзӣ кардаанд.

 АКС: Хадамоти матбуоти Раиси вилояти Суғд