Имконияти сармоягузории Тоҷикистон ба ҳайати соҳибкорони шаҳри Санкт – Петербурги Русия муаррифӣ гардид

ДУШАНБЕ, 26.05.2022 /АМИТ «Ховар»/. Зимни мулоқоти Раиси Кумитаи давлатии сармоягузорӣ ва идораи амволи давлатӣ Саъдӣ Қодирзода бо ҳайати соҳибкорону сармоягузорони шаҳри Санкт – Петербурги Федератсияи Русия таҳти роҳбарии муовини Раиси Кумитаи муносибатҳои берунаи Ҳукумати шаҳри Санкт – Петербург Арби Абубакров дар Душанбе тавсеаи ҳамкории дуҷониба миёни ду давлат баррасӣ шуд, хабар медиҳад АМИТ «Ховар» бо истинод ба Кумитаи мазкур.

Ба намояндагони Кумитаи муносибатҳои берунаи Ҳукумати шаҳри Санкт – Петербург имконияти сармоягузории мамлакат, қонунгузорӣ, имтиёзҳо ва соҳаҳои афзалиятноки ҳамкории дуҷонибаи иқтисодию тиҷоратӣ, густариши тиҷорату гуногунсозии ғуфра ва мизонҳои нави ҳамкорӣ, инчунин дарёфти ҳамтоён ва коршарикон аз доираҳои бахши хусусӣ муаррифӣ гардиданд.

Дар мулоқот ҷонибҳо вобаста ба тавсеаи равобити дуҷониба бар асоси манфиатҳои мутақобан муфид, баробар ва истифодаи самарабахш аз зарфияти иқтисодии ҳарду кишвар бо мақсади густариши равобити сармоягузорию соҳибкорӣ, иқтисодию тиҷоратии байни ду кишвар ба мувофиқа расиданд.

Дар маҷмӯъ, мусоҳибон дар вохӯрӣ барои дарёфти роҳҳои нави ҳамкории тиҷоратию иқтисодӣ ва сармоягузорию соҳибкорӣ табодули назар намуданд.

АКС: Кумитаи давлатии сармоягузорӣ ва идораи амволи давлатии Ҷумҳурии Тоҷикистон