Имзои беш аз 40 шартномаи ҳамкорӣ миёни ширкатҳои сайёҳии Тоҷикистон ва Узбекистон ба рушди туризм дар минтақа мусоидат мекунад

ДУШАНБЕ, 12.05.2022. /АМИТ «Ховар»/. Бо мақсади тавсеаи ҳамкории мутақобила миёни ширкатҳои сайёҳии Тоҷикистон ва Узбекистон беш аз 40 шартномаи ҳамкорӣ ба имзо расонида шуд. Дар ин бора АМИТ «Ховар» бо истинод ба Кумитаи рушди сайёҳии назди Ҳукумати Ҷумҳурии Тоҷикистон иттилоъ медиҳад.

Санадҳои ҳамкорӣ дар доираи баргузории Форуми саёҳативу тиҷоратии Тоҷикистон ва Узбекистон, ки чанде қабл дар шаҳри Хуҷанд –маркази маъмурии вилояти Суғд доир гардид, ба имзо расиданд.

Дар форум ҷонибҳо масъалаи дурнамои рушди ҳамкории минтақавӣ дар соҳаи сайёҳиро бо мақсади тавсеаи минбаъдаи робитаҳои мутақобилан судманд мавриди муҳокима қарор доданд. Намояндагони ширкатҳои сайёҳии ҳарду кишвар ҳамчунин оид ба масъалаи дастрасии нархҳо барои хизматрасонии сайёҳӣ дар давраи пас аз пандемия ибрози назар намуданд.

Зикр шуд, ки Тоҷикистон ва Узбекистон ду давлатеянд, ки таърихан муҳимтарин ҳалқаи Роҳи бузурги абрешим буданд. Онҳо дар чорроҳаи роҳҳои асосии тиҷорати ҷаҳонӣ қарор дошта, аз замонҳои қадим дар раванди ғанисозии мутақобилаи фарҳангу тамаддунҳо мавқеи муҳимро ишғол кардаанд.

Оғоз гардидани сафари бераводид миёни Тоҷикистон ва Узбекистон занҷири самараноке ба вуҷуд меорад, ки на танҳо ба рушди бахши сайёҳӣ байни ду кишвар, инчунин ҳамкории минтақавии сайёҳӣ мусоидат менамояд. Рушди сайёҳӣ, алалхусус қабули сайёҳони берунӣ ба сатҳи муносибатҳои мутақобилан судманди ҷонибҳо таъсири мусбат мерасонад.

Дар робита ба ин ба роҳ мондани ҳамкории самараноки ширкатҳои сайёҳии Тоҷикистон ва Узбекистон аз нигоҳи иқтисодӣ барои ҳарду кишвар манфиатовар аст.

Намояндагони ширкатҳои сайёҳии Узбекистон аз мавзеъҳои бостонию сайёҳии вилояти Суғд, назири Маҷмааи таърихию фарҳангии «Қалъаи Хуҷанд», «Қалъаи Муғ», Маҷмааи таърихии «Сари мазор», Панҷакенти қадим, пойгоҳи бостоншиносии «Саразм», масҷиди марказии «Шайх Муслиҳитддин», Қасри Арбоб, бозори «Панҷшанбе», осоишгоҳҳои «Шифо», «Баҳористон», Маркази таълимии Бонки миллӣ боздид намуда, бо иқтидор ва зарфияти сайёҳии шимоли Тоҷикистон шинос гардиданд.

АКС: Кумитаи рушди сайёҳии назди Ҳукумати Ҷумҳурии Тоҷикистон