Нақшаи рушди устувори сайёҳӣ ба идоракунии туризм аз рӯи захираҳои табиӣ ва фарҳангӣ мусоидат менамояд

Май 2, 2022 09:58

ДУШАНБЕ, 02.05.2022 /АМИТ «Ховар»/. Лоиҳаи Нақшаи рушди устувори сайёҳии Тоҷикистон барои давраи солҳои 2022-2030 дар ҳамоише, ки дар Душанбе бо иштироки намояндагони масъули вазорату идораҳои ҷумҳурӣ, бахши хусусӣ ва донорҳо доир гардид, баррасӣ шуд. Дар ин бора АМИТ «Ховар» бо истинод ба Кумитаи рушди сайёҳии назди Ҳукумати ҷумҳурӣ иттилоъ медиҳад.

Дар ҳамоиш зикр шуд, ки дар партави сиёсати созандаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади рушди соҳаи сайёҳӣ, аз ҷумла бунёди инфрасохтори соҳа ҳамкорӣ бо ниҳодҳои байналмилалии молиявӣ тақвият дода шуда, ҷалби маблағҳои грантӣ аз Бонки Осиёии Рушд ба маблағи 10 миллион доллари амрикоӣ барои татбиқи Лоиҳаи «Рушди сайёҳӣ» роҳандозӣ гардид.

Маблағи ҷалбгардидаи лоиҳаи мазкур ба омӯзиши  инрфасохтори соҳаи сайёҳӣ, омодасозии асосноккунии техникию иқтисодӣ барои лоиҳаҳои афзалиятнок, мукаммал намудани омори соҳаи сайёҳӣ, муайян намудани низоми омори сайёҳони дохилию хориҷӣ, хароҷоти дақиқи сайёҳони дохилию хориҷӣ дар дохили кишвар, саҳми туризм дар ММД ва сармоягузорӣ ва таъсиси ҷойҳои корӣ равона карда шудааст.

Ба лоиҳа 13 нафар мутахассисони Созмони умумиҷаҳонии сайёҳӣ ҷалб гардиданд. Ҳамчунин 4 нафар мушовири маҳаллӣ ва ду ташкилоти ҷамъиятӣ барои гузаронидани тадқиқот (сайёҳии дохилӣ ва байналмилалӣ) –«Фонди паст намудани сатҳи камбизоатӣ» барои гузаронидани тадқиқоти сайёҳии дохилӣ ва Маркази таҳлилии «Наво» барои тадқиқоти сайёҳони байналмилалӣ масъул мебошанд.


Мутахассисони соҳа барои таҳияи Нақшаи рушди устувори сайёҳии Тоҷикистон ва Низоми ёридиҳандаи омори сайёҳӣ TSA (Tourism Satellite Account) муваззаф гардиданд.

Дар ин давра Нақшаи рушди устувори сайёҳии Тоҷикистон барои давраи солҳои 2022-2030 аз ҷониби коршиносони СУС таҳия гардид, ки панҷ самти асосии фаъолиятро барои табдил додани бахш аз мавқеи кунунии худ ҳамчун муҳаррики дараҷаи дуюми иқтисодӣ ба қувваи асосии пешбарандаи рушди иқтисодӣ, эҷоди шуғл ва ҷалби сармоягузорӣ муайян менамояд. Ин самтҳо таҷдиди сохтори Кумитаи рушди сайёҳӣ, ҳалли масъалаҳои омори сайёҳӣ, қабули стратегияи мутамаркази маркетинг ва брендинг, баланд бардоштани малакаҳои бахши сайёҳӣ ва беҳтар намудани маҳсулоти сайёҳӣ мебошанд.

Ҳадафи бевоситаи нақша- таҳияи чаҳорчӯби умумии сиёсат барои рушди устувор ва идоракунии соҳаи сайёҳӣ аз рӯи захираҳои табиӣ ва фарҳангӣ мебошад, ки дар шакли Нақшаи дарозмуддати рушди устувори сайёҳӣ барои солҳои 2022-2030 пешниҳод шудааст.

АКС: Кумитаи рушди сайёҳии назди Ҳукумати Ҷумҳурии Тоҷкистон

Май 2, 2022 09:58

Хабарҳои дигари ин бахш

Соли 2023 ба буҷети шаҳри Гулистон аз ҳисоби хизматрасонии сайёҳӣ ва табобатӣ зиёда аз 40 миллион сомонӣ ворид шуд
«НАВРӮЗ — МЕРОСИ ФАРҲАНГИЮ ҶАҲОНГАРДӢ». Табиати зебои Тоҷикистон дили меҳмонони хориҷиро тасхир намуд
Ба шарафи Наврӯзи бостонӣ дар Кумитаи рушди сайёҳии Тоҷикистон ҳамоиши тантанавӣ доир шуд
Коршиносони олмонӣ дар ҷашни наврӯзии Донишгоҳи байналмилалии сайёҳӣ ва соҳибкории Тоҷикистон иштирок намуданд
Дар шаҳри Душанбе Фестивали байналмилалии «Наврӯз-мероси фарҳангию ҷаҳонгардӣ» баргузор гардид
Дар Боғи Ирами шаҳри Душанбе Фестивали байналмилалии «Наврӯз-мероси фарҳангию ҷаҳонгардӣ» бо намоиши ҳунарҳои мардумӣ доир гардид
Дар Намоишгоҳи байналмилалии сайёҳӣ ва меҳмоннавозии Москва имконоти сайёҳии Тоҷикистон муаррифӣ гардид
Масъалаи тақвияти ҳамкории Тоҷикистон ва Ҷопон дар соҳаи сайёҳӣ мавриди баррасӣ қарор гирифт
Ҷаласаи нуҳуми Шурои ҳамоҳангсозии миллӣ оид ба рушди соҳаи сайёҳӣ дар назди Ҳукумати Ҷумҳурии Тоҷикистон баргузор гардид
ФОРУМИ B5+1. Ҳамгироии иқтисодии минтақавии Осиёи Марказӣ тавассути муколамаи давлатӣ ва бахши хусусӣ тақвият меёбад
Дар шаҳраки бостонии Саразм майдони пазироӣ, дарвозаи рамзӣ ва терминали логистикӣ сохта мешавад
РӮЗИ МАТБУОТИ ТОҶИК. Кумитаи рушди сайёҳии Тоҷикистон заҳмати як зумра рӯзноманигоронро қадрдонӣ намуд