Ҳайати Тоҷикистон дар ҷаласаи коршиносони байналмилалӣ дар Истанбул иштирок намуд

Июнь 28, 2022 09:54

ДУШАНБЕ, 28.06.2022 /АМИТ «Ховар»/. Дар шаҳри Истанбули Ҷумҳурии Туркия ҷаласаи коршиносони байналмилалӣ дар мавзӯи  «Роҳандозии шабакаи ҳушдори аввалия дар самти муқовимот бар зидди терроризм барои кишварҳои Осиёи  Марказӣ» оғоз гардид. Ҷониби Тоҷикистонро дар конфронси мазкур олимону таҳлилгарони Маркази тадқиқоти стратегии назди Президенти Ҷумҳурии Тоҷикистон, Вазорати корҳои хориҷӣ, Вазорати корҳои дохилӣ ва дигар сохторҳои мартбут ба муқовимат бар зидди терроризм аз мақомоти дахлдори кишвар намояндагӣ менамоянд. Дар ин бора ба АМИТ «Ховар» дар Маркази тадқиқоти стратегии назди Президенти Ҷумҳурии Тоҷикистон хабар доданд.

Дар ҷаласаи мазкур  дар бахшҳои  «Таҳлили воқеаҳои дохилӣ дар Афғонистон», «Амнияти сарҳад, назорат сарҳадӣ ва таҳдидҳои аз Афғонистон бароянда» ва «Буҳрони башардӯстона дар Афғонистон ҳамчун таҳдид ба суботи минтақавӣ» муовини Директори Маркази тадқиқоти стратегии назди Президенти Ҷумҳурии Тоҷикистон Парвиз Муҳаммадзода ва дигар  коршиноси кишвар бо таҳлилҳои ҷолиб иштирок ва суханронӣ намуданд.

Тавре иттилоъ дода шуд, чорабинии мазкур бо суханронии ифтитоҳии Намояндаи махсуси Маркази минтақавии СММ оид ба дипломатияи боздоранда барои Осиёи Марказӣ Наталия Герман  ва Директори Дафтари зиддитеррористии СММ Доктор Ҷаҳонгир Хон ифтитоҳ гардид.

Сипас намояндагони раёсатҳои марбут ба муқовимат бар зидди терроризм аз мақомоти дахлдори кишварҳои Осиёи Марказӣ бо мавқегирӣ аз кишварҳои худ оид ба вазъи кунунии равандҳои сиёсию амниятии минтақаи Осиёи Марказӣ ва таҳдиду хатарҳои мавҷуда дар ин минтақа  суханронӣ намуданд.

Ҳамоҳангсозони доимии СММ дар кишварҳои Осиёи Марказӣ оид ба корҳои амалӣ, тадбирҳои андешидашуда ва ҳамкориҳои муштарак бо кишварҳои минтақа дар самти мубориза бар зидди экстремизми хушунатомез ва терроризми байналмилалӣ  изҳори андеша  намуданд.

Тибқи барномаи чорабинӣ аз сохторҳои марбутаи Ҷумҳурии Тоҷикистон оид ба муқовимат бар зидди терроризм, сардори  Раёсати мубориза бар зидди ҷиноятҳои муташаккили  Вазорати корҳои дохилӣ Шодӣ Ҳафиззода баромад намуда, оморҳои мушаххас ва ҷолибро дар самти  мубориза бар зидди экстремизми хушунатомез ва терроризми байналмилалӣ ироа намуд.

Ёдовар мешавем, ки  чорабинии мазкур бо ташаббуси муштараки Маркази минтақавии СММ  оид ба дипломатияи боздоранда барои Осиёи Марказӣ   ва Дафтари зиддитеррористии СММ дар чаҳорчӯби лоиҳаи «Ба сӯи татбиқи ҳамаҷонибаи Стратегияи ҷаҳонии зиддиттеррористии СММ дар Осиёи Марказӣ – марҳилаи 4 доир» баргузор гардид.

Мақсад аз баргузории ин ҳамоиш тавсеаи ҳамкорӣ ва ҳамоҳангӣ миёни сохторҳои қудратӣ, сохторҳои марбут ба муқовимат бар зидди терроризм, коршиносон, намояндагони созмонҳои минтақавӣ ва байналмилалӣ, инчунин механизмҳои минтақавӣ дар самти муқовимат бар зидди терроризм ҷиҳати коркарди  шабкаи ҳушдори аввалия дар сатҳи миллӣ ва минтақавӣ ҳамчун платформа барои баланд бардоштани иқтидор ва коркарди стратегияҳои зиддитеррористии самарабахш ва андешидани тадбирҳо барои вокуниши созгор бар зидди таҳдиду хатарҳо ба амният  ташкил медиҳад.

Бояд зикр  намуд, ки дар кори ҳамоиш намояндагони Маркази минтақавии СММ оид ба дипломатияи боздоранда барои Осиёи Марказӣ ва Дафтари зиддитеррористии СММ, намояндагони дигар созмонҳои минтақавӣ ва байналмилалӣ,  олимону пажӯҳишгарон, коршиносони масъалаҳои сиёсию амниятӣ аз марказҳои зеҳнии минтақавӣ  ва намояндагони раёсатҳои марбут ба муқовимат бар зидди терроризм аз мақомоти дахлдори кишварҳои Осиёи Марказӣ иштирок намуданд.

Акс: МТС ҶТ

Июнь 28, 2022 09:54

Хабарҳои дигари ин бахш

«БАЧА АЗИЗ, ОДОБАШ АЗ ОН АЗИЗТАР…». Ба таълиму тарбияи фарзандон набояд бетарафӣ зоҳир намуд
Маркази тадқиқоти стратегии Тоҷикистон ва Институти байналмилалии Осиёи Марказӣ масоили ҳамкории илмию таҳлилиро баррасӣ намуданд
35-СОЛАГИИ ИСТИҚЛОЛИ ДАВЛАТӢ. Беморхонаи марказии ноҳияи Темурмалик пурра навсозӣ гардид
ЗАБОН ДОНӢ-ҶАҲОН ДОНӢ. Аз 1 апрел кормандони мақомоти давлатӣ, худидоракунии маҳаллӣ ва ташкилотҳои давлатӣ ба омӯзиши ҳатмии забонҳои хориҷӣ фаро гирифта мешаванд
Дар ноҳияи Айнӣ сеюмин ҳамоиши гирандагони стипендияи президентӣ баргузор шуд
НАВРӮЗИ ХУҶАСТАПАЙ МУЖДАИ НЕКИ БАҲОРИ ХУРРАМ. Дар Суғд Ҷашни байналмилалии Наврӯз бо шукуҳи хоса таҷлил шуд
Тоҷикистон терроризму ифротгароиро қотеона маҳкум менамояд
24 МАРТ — РӮЗИ ҶАҲОНИИ МУБОРИЗА БО БЕМОРИИ СИЛ. Ҳадаф аз он огоҳӣ, пешгирӣ ва мубориза бар зидди ин беморӣ мебошад
ИМРӮЗ ДАР ТОҶИКИСТОН — РӮЗИ ГУЛ ВА НИҲОЛШИНОНӢ. Соли 2023 дар ҷумҳурӣ беш аз 1 миллион бех ниҳоли дарахтони гуногун шинонида шуд
МАСЛИҲАТИ МУТАХАССИС. Истеъмоли гулкарам масунияти инсонро боло мебардорад
МАСЛИҲАТИ МУТАХАССИС. Истеъмоли ғизои солим беҳтарин роҳи ҳифзи солимии шахс мебошад
Кормандони Вазорати меҳнат, муҳоҷират ва шуғли аҳолӣ ҷашни Наврӯзро бо тантана таҷлил намуданд