Дар Душанбе таҳти унвони «Логистика ва афзалияти он дар рушди робитаҳои нақлиётии Тоҷикистон» конфронс баргузор мешавад

ДУШАНБЕ, 21.06.2022/АМИТ «Ховар»/. Нимаи дуюми моҳи октябри соли равон дар шаҳри Душанбе таҳти унвони «Логистика ва афзалияти он дар рушди робитаҳои нақлиётии Тоҷикистон бо давлатҳои минтақа» конфронс доир мегардад, ки Вазорати нақлиёти Ҷумҳурии Тоҷикистон аз созмондиҳандагони он мебошад.

Ба АМИТ «Ховар» дар Вазорати нақлиёти Ҷумҳурии Тоҷикистон иттилоъ доданд, ки конфронс  бо мақсади мубодилаи иттилоотии илмӣ-амалӣ, пайдо намудани роҳҳои пешрафти техника ва технологияи муосир дар соҳаи нақлиёт, рушди ҳамкориҳо дар татбиқи барномаҳои муштараки илмӣ ва инноватсионӣ, роҳандозии таҷрибаи ҷумҳуриявӣ дар самти пешбурди логистика ва боз ҳам беҳтар ба роҳ мондани робитаҳои байналмилалӣ гузаронида мешавад.

Интизор меравад, ки иштирокдорони  конфронс масъалаҳои марбут ба танзими давлатии фаъолияти логистикӣ, дастовардҳои илмӣ-амалии фаъолияти логистикӣ, бозомӯзӣ ва омода намудани мутахассисон вобаста ба самтҳои логистика, рақамикунонии инфрасохторҳои логистикӣ, мушкилоти ташаккул ва рушди логистика, таҷрибаи рушди ширкатҳои нақлиётиву логистикӣ ва марказҳои нақлиётӣ-логистикиро баррасӣ намоянд.

АКС: Вазорати нақлиёти Ҷумҳурии Тоҷикистон