Дар Ҳисор ба муносибати Рўзи Ваҳдати миллӣ 17 иншоот ба истифода дода мешаванд

Июнь 22, 2022 10:07

ҲИСОР, 22.06.2022 /АМИТ «Ховар»/. Бахшида ба таҷлили ҷашни 25-солагии Рӯзи Ваҳдати миллӣ дар шаҳри Ҳисор 17 иншоот, аз ҷумла як корхонаи саноатии истеҳсоли шифери азбестӣ, чандин муассисаҳои тандурустӣ, марказҳои савдою хизматрасонӣ, сардхона ва дигар намуди иншоот ба истифода дода мешаванд. Дар ин бора 20 июн дар ҷаласаи кории раиси шаҳри Ҳисор иттилоъ дода шуд.

Тавре дар Мақомоти иҷроияи ҳокимияти давлатии шаҳри Ҳисор ба хабарнигори АМИТ «Ховар» хабар доданд, раиси шаҳри Ҳисор Қосим Роҳбар дар ҷаласаи корӣ аз дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон, ки 18 июни соли равон зимни машварати корӣ дар ноҳияи Данғара дода буданд, ёдовар шуда, роҳбарони ташкилоту раёсатҳои давлатӣ ва бахшу шуъбаҳои ҳукумати шаҳрро баҳри иҷрои саривақтии онҳо таъкид намуд.

Дар ҷаласа зикр гардид, ки Пешвои миллат муҳтарам Эмомалӣ Раҳмон масъалаҳои раванди ободкориву созандагӣ, вазъи душвори кунунии ҷаҳонӣ, дигаргуниву таҳаввулоти вақтҳои охир дар сайёра, таъсири ин омилҳо ба иқтисодиёти мамлакат ва муайян кардани вазифаҳо ҷиҳати ҳалли мушкилоти бамиёномадаро мавриди таҳлил ва баррасӣ қарор доданд ва таъкид намуданд, ки буҳронҳои сиёсии ҷаҳони имрӯза, низоъҳои минтақавӣ, таҳримҳои иқтисодиву тиҷоратии байни давлатҳо, кам гардидани истеҳсоли маҳсулоти ғизоӣ ва болоравии бесобиқаи нархи онҳо дар баъзе минтақаҳои ҷаҳон, инчунин паҳншавии бемориҳои сироятӣ ҷомеаи ҷаҳонро ҷиддӣ нигарон кардаанд, ки ба мамлакати мо низ бетаъсир буда наметавонад.

Раиси шаҳри Ҳисор вобаста ба дастури Президенти мамлакат ба муовинони соҳавӣ ва сардори раёсати кишоварзӣ супориш дод, ки кишоварзон ба масъалаи беталаф ҷамъоварӣ намудани маҳсулоти ғалладонагиҳо, истифодаи самараноки обу замин ва дар заминҳои обӣ ҳатман ба роҳ мондани кишти такрорӣ, бахусус картошка, маккаи дон ва лӯбиёгиҳо диққати аввалиндараҷа диҳанд. Ҳамчунин роҳбарони зергурӯҳҳои кории 35-солагии Истиқлол, ки аз ҳисоби муовинони раиси шаҳр таъйин шудаанд, таъкид гардиданд корҳои фаҳмондадиҳиро дар шаҳр тақвият бахшанд, ташкилоту муассисаҳо ва ҳар як оила барои таъминоти худ барои ҳарчи бештар истеҳсол кардани маҳсулот ва барои ду сол захира намудани маводи ғизоӣ чораҳои зарурӣ андешанд, то ки дар фасли тирамоҳу зимистон ба танқисиву муҳтоҷӣ рӯ ба рӯ нагарданд.

Ҳамзамон дар доираи корҳои ободонӣ иваз намудани симчӯбу хатҳои барқ, трансфарматори барқӣ, таъмиру мумфаршкунии роҳҳо дар назар дошта шудааст. Дар Ҷамоати шаҳраки Ҳисор барои бунёди бинои беморхонаи касалиҳои пӯст санги асос гузошта шуда,  корҳо дар ин самт оғоз меёбанд.

АКС: Мақомоти иҷроияи ҳокимияти давлатии шаҳри Ҳисор

Июнь 22, 2022 10:07

Хабарҳои дигари ин бахш

35-СОЛАГИИ ИСТИҚЛОЛИЯТИ ДАВЛАТӢ. Дар Хуҷанд инфрасохтори муҳими коммуналӣ навсозӣ карда мешавад
Байни Мақомоти иҷроияи ҳокимияти давлатии шаҳри Турсунзода ва ҶДММ «Илму адаб» созишнома ба имзо расид
35-СОЛАГИИ ИСТИҚЛОЛИ ДАВЛАТӢ. Дар Панҷакент беш аз 800 иншооти таъйиноти гуногун ба истифода дода шуд
35-СОЛАГИИ ИСТИҚЛОЛИ ДАВЛАТӢ. Дар ноҳияи Ҷаббор Расулов барои 200 тарбиятгиранда кӯдакистон сохта мешавад
35-СОЛАГИИ ИСТИҚЛОЛИ ДАВЛАТӢ. Дар Панҷакент иншооти нави таълимӣ ва варзишӣ ба истифода дода шуд
35-СОЛАГИИ ИСТИҚЛОЛИ ДАВЛАТӢ. Дар шаҳри Хуҷанд сохтмони иншооти ҷашнӣ вусъати тоза меёбад
35-СОЛАГИИ ИСТИҚЛОЛИ ДАВЛАТӢ. Хиёбону кӯчаҳои шаҳри Турсунзода ба гулзор табдил дода шуданд
Даври сеюми Озмуни ҷумҳуриявии «Тараннуми Ватан» баргузор гардид
Пешвои миллат Эмомалӣ Раҳмон дар ноҳияи Темурмалик майдони Парчами давлатии Ҷумҳурии Тоҷикистонро ифтитоҳ намуданд
Президенти Ҷумҳурии Тоҷикистон Эмомалӣ Раҳмон дар ноҳияи Темурмалик варзишгоҳи марказиро ба истифода доданд
Пешвои миллат Эмомалӣ Раҳмон дар ноҳияи Темурмалик якчанд иншооти соҳаҳои маориф, тандурустӣ ва обтаъминкуниро тариқи фосилавӣ ифтитоҳ намуданд
Сарвари давлат Эмомалӣ Раҳмон Мактаби президентии ноҳияи Темурмаликро ифтитоҳ намуданд