Дар Душанбе давраи омӯзишӣ барои кормандони китобхонаҳои шаҳрӣ ҷамъбаст гардид

Июль 28, 2022 09:39

ДУШАНБЕ, 28.07.2022 /АМИТ «Ховар»/. 27 июл дар Муассисаи давлатии «Китобхонаи марказонидашудаи шаҳрии ба номи А. Лоҳутӣ» давраи омӯзишии серӯза барои кормандони китобхонаҳои шаҳри Душанбе оид ба муосиргардонии китобхонаҳо чамъбаст гардид. 

Тавре ба АМИТ «Ховар» дар Раёсати фарҳанги мақомоти иҷроияи ҳокимияти давлатии шаҳри Душанбе хабар доданд, давраи омӯзишии мазкур бо мақсади баланд бардоштани касбияти кормандони китобхонаҳо, табодули таҷрибаи онҳо дар ин самт, беҳтар намудани сатҳу сифати хизматрасонӣ ба муштариён ва ҷалби мутахассисони соҳибтаҷриба дар китобхонаҳо роҳандозӣ карда шуданд.

Дар ҷамъбасти давраи омӯзишӣ муовини сардори Раёсати фарҳанги Мақомоти иҷроияи ҳокимияти давлатии шаҳри Душанбе Абдувалӣ Абдураҳмонзода, Директори  Муассисаи давлатии «Китобхонаи марказонидашудаи шаҳрии ба номи А. Лоҳутӣ» Абдуқодир Талбаков ва кормандони китобхонаҳои пойтахт иштирок намуданд.

Нахуст иштирокчиён аз намоиши китобҳо, ки дар даромадгоҳи китобхона гузошта шуда буд, дидан намуда, бо фаъолияти Китобхонаи марказонидашудаи шаҳрии ба номи А. Лоҳутӣ шинос шуданд.

Директори китобхона Абдуқодир Талбаков вобаста ба саҳми китоб дар тарбияи ҷомеа ва насли наврас сухан гуфт. Муовини сардори Раёсати фарҳанги мақомоти иҷроияи ҳокимияти давлатии шаҳри Душанбе Абдувалӣ Абдураҳмонзода оид ба аҳамияти курсҳои омӯзишӣ ва саҳми Президенти мамлакат дар рушди соҳаи фарҳанг, ҳунар, китоб ва баланд бардоштани ҳувияти миллӣ миёни ҷавонон иброз дошт, ки «курсҳои мазкур дар асоси нақшаи «Барномаи рушди муассисаҳои фарҳангии Ҷумҳурии Тоҷикистон барои солҳои 2021-2025 дар шаҳри Душанбе», ки бо қарори Раиси шаҳри Душанбе аз 5 июли соли 2021 тасдиқ гардидааст, роҳандозӣ карда шуданд».

Дар анҷом  барои саҳми арзанда дар рушди соҳаи китобдорӣ, ҷалби бештари аҳолӣ ба китобхонӣ аз ҷониби Раёсати фарҳанги Мақомоти иҷроияи ҳокимияти давлатии шаҳри Душанбе ба иштирокчиён сипоснома тақдим карда шуд.

Ёдовар мешавем, ки давраи омӯзишӣ аз 25 то 27 июл доир гардида, зимни он кормандони китобхонаҳо тибқи барнома бо фаъолияти Китобхонаи миллии Тоҷикистон, Китобхонаи муосири  «Пойтахт», Китобхонаи ҷумҳуриявии бпчагонаи ба номи М.Миршакар, Китобхонаи марказонидашудаи шаҳрии ба номи А. Лоҳутӣ  шинос шуданд.

АКС: Раёсати фарҳанги мақомоти иҷроияи ҳокимияти давлатии шаҳри Душанбе

Июль 28, 2022 09:39

Хабарҳои дигари ин бахш

ТАВСИЯИ МУТАХАССИС. Дар мавриди фоидаи ғизо ва нӯшокиҳо барои саломатӣ дар фасли зимистон
Китоби «Сотим Улуғзода дар шинохти Пешвои миллат» ба нашр расид
Бахшида ба фаъолияти Президенти Тоҷикистон китоби нав рӯнамоӣ гардид
Шералӣ Хоҷазода: «Маърифати ҳуқуқӣ омили муҳими ҳифзи мероси таърихию фарҳангӣ мебошад»
Доир ба саҳми Эмомалӣ Раҳмон дар татбиқи стратегияи рушди Ҷумҳурии Тоҷикистон китоби нав рӯнамоӣ гардид
Таҳти унвони «Президент — шаҳсутуни истиқлол ва давлатдории миллӣ» конференсияи ҷумҳуриявӣ доир шуд
Ҷилди сеюми китоби «Абармарди таърихсоз»-и академик Фарҳод Раҳимӣ ба нашр расид
Ҳамкории Тоҷикистон ва Қазоқистон дар соҳаи ҳифзи мероси фарҳангӣ ва хаттӣ густариш меёбад
Дар ёдгории таърихии Қалъаи «Золи Зар»-и ноҳияи Данғара корҳои сохтмонӣ оғоз гардиданд
Байни Тоҷикистон ва Қазоқистон дар самти рушди соҳаи китобдорӣ Ёддошти тафоҳум оид ба ҳамкорӣ ба имзо расид
Намоиши «Достони Сиёвуш» дар Москва ба саҳна гузошта шуд
Намоишномаи мазҳакавии таҳти унвони «Хоҳ биёӣ, хоҳ наё» дар Москва ба саҳна гузошта шуд